É sorprendente o que pode facer a distancia. Homes botándose as mans á cabeza polo caso de Mia moglie, o grupo de Facebook con 30.000 señores que compartían fotos íntimas das súas esposas sen consentimento. Ou da web na que se facían comentarios machistas, soeces, vulgares e que incitaban á violencia sexual contra mulleres, incluíndo a políticas, deportistas e xornalistas. Alá, lonxe, en Italia ou en Francia, léndoo nas páxinas dun xornal, é repugnante. Aquí, xusto ao lado, cando o compañeiro de oficina entra lanzado berros machistas e homófobos, cando un día detrás doutro fai comentarios sexuais sobre mulleres, son bromas. Ou que é así, ou que non é para tanto. Ou xúntanse varios a rirlle os comentarios. Aquí, ao lado, quizá no teléfono do home que agora mesmo toma café ao seu lado, hai ducias de grupos de WhatsApp deses que chaman «de tetas», onde hordas de señores dedícanse a compartir contido sexual e onde non poucas veces acírranse comentarios que deshumanizan, cousifican e incitan á violencia contra as mulleres. Pero como é o cuñado, o irmán, o amigo, o fillo, o compañeiro de traballo, non é para tanto. Ou dá un pouco de grima, pero miramos cara a outro lado. Non. Non é unha excepción. Nin un escándalo. É a hipocrisía dunha sociedade que convive con Mia moglie a diario.