Ryanair, líder do tráfico aéreo en Galicia, deixa só cinco rutas en Santiago e vaise de Vigo
GALICIA
Pecha a súa base de Lavacolla e só manterá 15 voos semanais. Recorta dous millóns de prazas en toda España acusando ao Goberno de impor unha subida de taxas aeroportuarias. Aena saca á luz a prima de 100 millóns que recibirá o xefe da aeroliña
03 sep 2025 . Actualizado á 20:18 h.Ryanair fai oficial o seu órdago ao Goberno de España eliminando dunha plumada dous millóns de prazas anuais dos aeroportos da rede de Aena nos que a aeroliña irlandesa está aínda presente. Como adiantou hoxe nunha entrevista a La Voz de Galicia o conselleiro delegado da compaña, Eddie Wilson, Ryanair notificou formalmente a través dun encontro cos medios de comunicación celebrado en Madrid, que pecha a base aberta en Santiago de Compostela, desaparece dos aeroportos de Vigo e Tenerife Norte, e mete a tesoira de xeito drástico á súa oferta na mesma pista compostelá, ademais de en Asturias, Santander, Zaragoza e as illas Canarias a partir da tempada aérea de inverno que comeza o ultimo fin de semana de outubro.
O movemento de repregamento da aeroliña líder en España no último decenio e tamén primeira no aeroportuario galego ata o ano pasado, salvo na paréntese de mobilidade xerado pola pandemia, supón un golpe considerable á oferta aérea existente en Galicia, pois elimina desde Santiago as súas rutas de Madrid, Barcelona, Málaga, Alacante, Gran Canaria, Palma de Mallorca e Zaragoza, algunhas delas básicas nas posibilidades vacacionais dos galegos. O repregamento da compaña de baixo custo en España non fai máis que confirmar tamén o peche previsto a partir do 1 de xaneiro da ruta entre Vigo e Londres Stansted, ao esgotarse o prazo do concurso municipal co que operou desde Peinador á capital británica durante tres anos a cambio de 1,80 millóns de euros pagos polo Concello. En marzo deste ano xa eliminara da grella viguesa tamén a ruta a Barcelona.
O recorte anunciado para Santiago, onde elimina os dous avións da súa base que garantían a Lavacolla senllos voos á primeira hora e achegaba un notable equipo de traballadores propios e indirectos, tamén afecta o número de frecuencias que terán os cinco destinos que quedarán por agora: Tenerife sur baixa de 10 a só 3 voos á semana, Valencia de 8 a 4, e tanto Lanzarote como Londres quedan con unicamente dúas, en lugar dos cinco da actual campaña. Só os catro voos á semana con Sevilla manterán a súa actual cadencia.
No resto de España reduce a súa capacidade en Zaragoza (-45%), Santander (-38%), Asturias (-16%) e Vitoria (-2%), e cancela 36 conexións directas coa España rexional e as Illas Canarias. Na rede aeroportuaria peninsular Ryanair baixará un 41% o número de prazas para este inverno, e un 10% en Canarias, asegurando Wilson que dita medida débese á o aumento dun 6,2% das taxas que cobrará Aena o ano que vén ás compañas tras mantelas dez anos conxeladas. Segundo sinalou o directivo de Ryanair, o aumento de taxas prexudicará máis aos aeroportos vulnerables e conducirán a «unha perda de investimento, conectividade, turismo e emprego na España rexional xa que moitas rutas serán economicamente inviables».
O Goberno central tachou de «chantaxe» a espantada de Ryanair, engadindo que ningunha compaña vai ditar como debe de ser o sistema tarifario en España, executado por Aena, empresa cotizada e pública nun 51%.
En Galicia, a Xunta foi a primeira institución en reaccionar e a través do conselleiro de Presidencia, Diego Calvo, quen advertiu que as competencias sobre o tráfico aéreo en España son do Goberno central, así como a propiedade de todos os aeroportos depende do monopolio como cualificou a Aena. «Queremos denunciar o trato que o Goberno de España dispensa aos aeroportos medianos e pequenos, como os tres aeroportos galegos, a través de Aena que debería ter entre os seus principais obxectivos afondar nese reequilibrio territorial en toda España, apostar por aqueles aeroportos medianos e pequenos no canto de facelo polos grandes, que xa funcionan sós».
Calvo acusou a Aena de en lugar de exercer un papel estratéxico e reequilibrador no transporte estar «centrada única e exclusivamente en conseguir máis beneficios», que apuntou foron o ano pasado de máis de 1.900 millóns de euros. «Queremos esixir desde a Xunta de Galicia ao Goberno do Estado que cambie o trato que dispensa aos aeroportos pequenos e medianos», dixo ao fío do anuncio de Ryanair. O conselleiro de Presidencia avanzou que a Xunta pedirá unha reunión urxente do Comité de Coordinación Aeroportuaria de Galicia, onde está presente Aena, para esixirlle un cambio na súa política en relación aos pequenos e medianos aeroportos».
Dura resposta de Aena
O presidente de Aena, Maurici Lucena, tamén saíu ao paso das acusacións de Ryanair advertindo «deshonestidade» na política de comunicación da compaña, «insolencia e desinhibición» na formulación pública das súas esixencias aos gobernos dos países nos que opera a aeroliña, e en definitiva «unha inquietante concepción plutocrática do sistema político, é dicir, atemoriza á opinión pública coa retirada dos seus avións, reclama a dimisión de ministros de media Europa e da presidenta da Comisión Europea, búrlase dos políticos elixidos democraticamente e pide o cambio de leis ao seu favor porque considera que a toma de decisións dos gobernos debe dobregarse aos intereses das empresas con maior poder económico, como Ryanair, no canto de protexer o interese xeral».
Lucena subliña que o xeito de operar e esixir rebaixas nos seus custos aeroportuarios repetiuse nos países nos que está presente, «nos que desprega un pressing público constante aos gobernos centrais e rexionais co fin de obter beneficios económicos a curto prazo a expensas do diñeiro dos contribuíntes e da sustentabilidade a longo prazo do sistema aeroportuario».
O máximo responsable de Aena nega a afirmación dos directivos de Ryanair de que «'España está agora mesmo pechada ao turismo e que o Goberno de España é antiturismo'. Esta afirmación produce unha estupefacción inefable», engade Lucena para contrastala coa marca histórica de 100 millóns de turistas que se estima acadará o país ao pechar o ano.
Rexeita finalmente que Aena marxine aos aeroportos rexionais, como sostén Ryanair, apuntando que neles este ano páganse unhas taxas de 2 euros por pasaxeiro, en lugar dos 10,35 nos que sitúa a media da rede estatal. Lucena non elude o corpo a corpo co conselleiro delegado de Ryanair, chegando a afirmar que Michael Ou`Leary percibirá este ano un «estratosférico bonus de máis de 100 millóns de euros en función do cumprimento dunha serie de obxectivos e a súa continuidade na empresa».