Desde o ano 1969 ata o 2001, a famosa familia televisiva foi propietaria de oito turismos: un Seat 800, un 850 e un GS break de paquete, un Mercedes w114 importado de segunda man, un eterno Citroën BX, un moderno BMW E28, un Jeep todo terreo e un fugaz Mercedes clase S.
11 dic 2023 . Actualizado ás 13:29 h.A serie de televisión Cóntame como pasou serviu a moitos espectadores como repaso histórico a través da ficción desde 1968, pero tamén foi unha forma de lembrar o parque móbil español das últimas décadas.
Foron centenares os coches protagonistas dos 413 episodios que apareceron ao longo das 23 tempadas en emisión e máis de dúas décadas en pantalla, imposibles de describir nunha única reportaxe. No entanto, si resulta máis sinxelo repasar os oito turismos que a familia Alcántara tivo ao longo da serie que chegou en novembro ao seu fin.
Todo o relacionado co mundo do motor foi bastante fiel á realidade, aínda que houbo algúns detalles pouco rigorosos e diferenzas entre os anos de fabricación e matrícula dos modelos que aparecían na serie, ou a aparición de adhesivos da ITV en datas nas que non existía este servizo.
O protagonista e patriarca da familia recoñecíase afeccionado ao mundo do motor, aínda que nos inicios da serie non tiña nin coche nin carné de conducir. Soñou con moitos modelos que inicialmente non puido comprar, aínda que ,a medida que as cousas lle ían ben, os modelos da súa propiedade crecían en luxo e prezo.
O primeiro coche que conduciu Antonio Alcántara en 1969, tras sacar, non sen esforzo, o permiso de condución foi un Seat 800 verde escuro, a versión catro portas do mítico Seat 600, no que viaxaban 5, 6 ou as persoas fosen, ao non existir gran control naquela data e ser habitual o exceso de pasaxeiros nos precarios vehículos. Foi un agasallo da familia ao patriarca, comprado de segunda man. Tivérono durante escasos dous anos e acabou con pintadas de «ladrón» e esnaquizado tras a estafa na que se viu envolto Antonio na construtora Nova York e que constituíu a súa primeira ruína persoal. quedou durante un tempo sen vehículo propio. Do 800 fabricáronse pouco máis de 18.000 unidades de forma case artesanal e foi un coche pouco frecuente que non tivo homólogo italiano en Fiat.
A segunda compra foi un Seat 850, cor granate, novo, «de paquete», que permanecería catro anos na familia de ficción, desde 1970 a 1974, cando se recuperou a economía familiar. Sufriu algún accidente por culpa das actividades políticas do fillo maior, Toni, e mesmo cambiou de cor, a gris, por esta cuestión, xa que tras collelo de forma clandestina e darlle un golpe reparárono de madrugada nun taller dun amigo e non tiñan a cor orixinal do coche, polo que o pintaron doutro. Ao longo de oito anos de produción saíron á rúa máis de 650.000 unidades deste modelo e converteuse nun coche moi popular.
En terceiro lugar chegou un glamuroso francés, un Citroën GS break, beis, tamén novo, que estivo nove anos na familia e que pasou de ser coche principal a segundo utilitario dous anos despois da compra. Tivo dúas matrículas distintas, en función da tempada, sen unha causa aparente.
O cuarto coche dos Alcántara xa foi un Mercedes Benz, azul escuro, comprado nun multiventa de importación, con carrocería w114, que estivo de 1976 a 1982 coa familia, ata que acabou sinistro total nun accidente de tráfico de Antonio coa que era o seu amante, Paz. Foi propiedade da familia en dúas ocasións, xa que tiveron que vendelo nun momento de crise económica, pola quebra do Banco de Granada, onde tiñan os seus aforros, pero Antonio volveuno comprar cando se recuperaron da fochanca e a súa poder adquisitivo permitiullo de novo. Un vehículo de luxo, que circulaba pouco pola España da época, aínda que logo foron moitos os emigrantes españois que llos trouxeron de Centroeuropa.
O quinto coche da televisiva familia foi un Citroën BX vermello, que tomaba a vez do GS e que foi o coche que máis tempo estivo cos Alcántara, desde 1983 ata o final da historia principal, no 2001, nada menos que 18 anos. Sufriu varios accidentes, regaláronllo ao fillo menor, Carlos, que tamén o accidentou, e regresou a mans de Merche cando Carlos se foi vivir a Estados Unidos. Estivo rotulado como coche de empresa da adega de Antonio, en Sagrillas. O modelo, pola matrícula, tería que ser da primeira serie, cos intermitentes dianteiros amarelos, aínda que o que aparecía en pantalla era o da segunda serie, con eles transparentes. Fabricáronse máis de dous millóns de unidades nos doce anos que estivo en produción.
A sexta unidade foi un BMW E28, branco, que en 1986 recibiu Antonio como agasallo dos seus fillos, tras o falecemento de Miguel, o seu irmán, pero que acabaría accidentado en 1990, cando o conducía Merche. Un coche escaso nas estradas españolas, que era a segunda xeración do Serie 5 e que se fabricou entre 1981 e 1987.
O sétimo sería un Jeep Wrangler, negro, que tamén recibiría Antonio como agasallo do irmán da que fose o seu amante como pagamento por unha operación económica de venda de uva. Sería o único dos coches da familia todo terreo e con matrícula de fóra de Madrid, concretamente de San Sebastián.
O último coche da familia apareceu no penúltimo episodio, emitido o 22 de novembro do 2023. Un impoñente e fugaz Mercedes Benz da clase S, do ano 2001, azul escuro, co que se desprazou a familia desde o barrio madrileño de San Genaro á localidade albaceteña de Sagrillas para celebrar a voda da filla menor, María. Deste coche non houbo referencias en canto á compra, como si sucedera cos sete precedentes. No último episodio, do 29 de novembro, Antonio Alcántara non sae de Sagrillas e non se lle ve aos mandos de ningún coche.