Unha trintena de percebeiros foron a traballar «ás carreiras» para lograr un puñado de crustáceos
18 dic 2018 . Actualizado ás 11:33 h.«Hai 24 nós de vento e ondas de catro metros na costa. Foi moi complicado traballar e andabamos todos ás carreiras». Roberto Vidal Pombo, patrón maior da confraría de Corme (Ponteceso, 5.613 habitantes), estaba este luns moi preocupado pola campaña do Nadal do percebe, que acaba de arrincar.
A agrupación decidira abrir o seu recuncho máis valioso, O Roncudo, que permanecía pechado desde xullo. O cabildo fixara 6 quilos de crustáceo por mariscador e día. Pero ningún dos trinta percebeiros, que se xogaron literalmente a vida entre ondas de catro metros, logrou o seu prezado botín: «Meu irmán e mais eu sumamos 3 ou 4 quilos e os demais, creo que nin iso. E traballando na parte alta das rocas», apuntou un patrón maior que ve como unha das campañas máis importantes para o sector está a piques de irse pola borda nada máis empezar. Algo que Roberto Vidal achaca ao mal tempo: «Levamos varios temporais, alertas laranxas e esta semana, para colmo, temos mareas mortas, que nos obrigan a ir traballar polas tardes». E engadiu: «A baixamar, ou é moi cedo ou é moi tarde. Hoxe [por este luns] comezamos ás catro da tarde e rematamos ás seis porque, unha, a Xunta non permite estar máis aló desa hora no mar, e dúas, era case de noite e, polo tanto, un perigo andar ás carreiras polas rochas».
Peor hoxe
Pero o peor prevese para hoxe: «Dan vento de case 50 nós e ondas de 6 metros», vaticinou Roberto Vidal, quen xa anunciou que na confraría de Corme darían vía libre ao que se queira arriscar a ir ao Roncudo: «Catro quilos de hoxe e outros catro quilos de maña xa son oito ». No seu caso, non ten dúbida algunha de que irá traballar: «Teño que aproveitar para gañar algo. Vese percebe no Roncudo, o que pasa é que o mar non che permite collelo, tes que traballar moi arriba».
Na Barca
En Muxía tamén hai preocupación por este arranque de campaña do Nadal. Este luns foron ata a contorna da Barca uns 70 mariscadores, «con moito mar picado e ondas de 4 e 5 metros», apuntou Víctor Feixe Soneira, vicepatrón maior primeiro da confraría de Muxía e presidente da agrupación de percebeiros. Segundo el, a meteoroloxía adversa continuará toda a semana: «Para mañá [hoxe] dan outra alerta laranxa, e, se hoxe xa foi complicado traballar, mañá vai ser imposible e creo que toda a semana». No caso do depósito muxián son 7 quilos asignados por percebeiro e día. Pero a gran maioría dos que este luns lla xogaron para traballar neste emblemático recuncho costeiro muxián apenas colleu os topes establecidos, tal e como sinalou Víctor Feixe.
Esperanza
Só hai unha esperanza para os percebeiros: que a Xunta lles permita ir traballar osábado . A petición está cursada e agora a pelota está no tellado de Rosa Quintana. En xogo están os ingresos de máis de 400 familias da Costa da Morte, que directa ou indirectamente viven deste crustáceo.
Percebeiros coruñeses solicitan a Mar poder traballar o sábado
O risco de que a campaña do Nadal do percebe se vaia pola borda é moi real, segundo aseguran na Costa da Morte. O sábado pasado, representantes dos depósitos de Camelle (Camariñas), Corme (Ponteceso), Malpica, Laxe e Muxía reuníronse en Corme para analizar a situación e acordaron pedir á Consellería do Mar que permita faenar o sábado.
O mal tempo das últimas semanas, as nefastas previsións, as mareas mortas e as escasas vendas converten case nun imperativo aproveitar a que se presenta como a mellor marea da tempada. Non só o opinan na Costa da Morte. Tamén en Aguiño, Ferrol, Cedeira e outros depósitos percebeiros da Coruña, por iso é polo que a petición se cursase, ademais, a través da federación provincial da Coruña.
Para a fin de semana prevese que mellore o tempo e as mareas recuperen os seus ciclos naturais. Só falta o visto e prace de Mar.