A praza de abastos de Vilalba funciona a medio gas: «Se houbese máis postos, viría máis xente»
VILALBA
O Concello anima a vendedores interesados a estudar a posibilidade de instalarse no céntrico edificio
23 ene 2024 . Actualizado á 18:40 h.Este martes é día de mercado en Vilalba. Quen se achegue á praza de abastos poden comprar nunha peixaría ou nun negocio de froita e de verdura. Son os dous únicos establecementos dunha instalacións que só teñen actividade os martes e os venres, días de mercado na capital chairega. Trátase, pois, dun edificio que funciona a medio gas. Con todo, trátase dunha situación que contrasta con investimentos recentes e ata con impresións de quen mantén a venda.
Tomando como referencia, precisamente, a opinión dos vendedores, o placeiro Luis Flórez é claro: «Se houbese máis postos, viría máis xente», di. Leva máis de 30 anos acudindo a Vilalba coa súa mercancía, que compra na lonxa de Burela. Tanto tempo en contacto con clientes vilalbeses pasou por momentos en que estaba acompañado por outros vendedores e por momentos nos que non había ningún outro posto aberto. Agora, de todos os xeitos, recoñece que sente a gusto porque os encargados doutro posto fanlle compaña.
Desde hai un ano, os martes e os venres acoden á praza de abastos membros de A Estruga, unha sociedade formada por agricultores de Vilalba e de Xermade. Os seus integrantes se turnan en levar produtos que cultivan nas súas leiras, e ocupan precisamente o espazo no que antes se instalou unha vendedora con mercancía similar. No entanto, nos plans de A Estruga non está un aumento dos días de venda, xa que se trata de agricultores con pequena produción e abóndanlles, como eles explican, os martes e os venres para recibir encargos e para vender.
Nos plans do Concello, de todos os xeitos, hai sitio para unha perspectiva con máis vendedores. Así o manifestou este luns a alcaldesa, Marta Rouco. Por unha banda, admite que é complicado lograr a ocupación de máis postos; por outro, di que «sería estupendo» contar con máis placeiros, e anima a vendedores interesados a pasar pola Casa do Concello e coñecer as condicións para instalarse no edificio. Tamén destaca que o edificio, no centro da vila e próximo a zonas de comercio, pode ser un aliciente.
Un traslado e unha reforma
Os postos da praza de abastos están no soto do edificio, con entrada pola rúa dos Pepes e ao lado do aparcadoiro subterráneo da praza da Constitución. Na pasada década trasladáronse desde a anterior localización, na planta baixa. Unha zona da planta baixa acolle a Unidade de Atención Temperá, mentres que na outra se instalará un Punto de Atención á Infancia (PAI), co que o Concello quere aumentar as prazas para nenos de menos de tres anos, agora insuficientes a pesar de haber dúas garderías na capital chairega.
O soto reformouse a pasada década cun investimento duns 200.000 euros, achegados pola Xunta e polo Concello vilalbés. Cando os postos abriron na nova localización, había catro (dúas peixarías, unha carnicería e unha froitería). Só o peixeiro Luis Flórez permanece desde entón.