Haberá catas, charlas, degustacións, mercado, talleres e música
06 dic 2023 . Actualizado ás 12:59 h.Muras prepárase para celebrar esta fin de semana a VIII Feira do Mel de Montaña, que estaba prevista inicialmente para novembro, pero que tivo que ser aprazada polas obras no Viveiró. Catas, charlas, degustacións, mercado, talleres e música darán vida a esta clásica celebración na Praza do Viveiró os días 9 e 10.
O sábado 9 abrirá a festa cunha cata de mel de montaña ás 17.30 horas. Ás 20.00 terá lugar a conferencia «Invernada dás abellas», a cargo do biólogo e apicultor Miguel Vélez. Pola noite, ás 21.30, celebrarase a degustación gratuíta de liscos, amenizada polo Dúo Musical Pedriñas.
En canto ao domingo 10, a feira abrirá as súas portas ás 10.00 e haberá pasacalles e música en directo para amenizar toda a xornada. Ás 11.00 celebrarase un obradoiro de cera, a cargo da asociación Casa do Mel de Goente. Ás 12.00 comezará un showcooking con Lucía Freitas, propietaria e chef dos restaurantes Lume e A Tafona, galardoado cunha estrela Michelín. Ás dúas será a comida e pola tarde, ás 16.00, empezará un taller de cociña para os máis pequenos, impartido por Espazo Vivo. Ás 19.00 terá lugar a entrega de premios do concurso de cata de mel de montaña.