O condutor dun vehículo e dous pasaxeiros sufriron lesións leves tras chocar contra un talude
15 abr 2025 . Actualizado á 18:05 h.Tres persoas resultaron feridas este martes tras sufrir un accidente de tráfico na N-640 ao seu paso polo municipio lucense de Riotorto. Sucedeu ás 07.59 horas.
O turismo, que circulaba polo quilómetro 49, saíuse da vía pola marxe dereita e chocou contra un talude situado a uns dous metros da estrada.
O condutor e dous ocupantes resultaron feridos. Ata o lugar desprazáronse efectivos da Garda Civil de Tráfico, do 061 e de Conservación de Estradas.
Noutra intervención, pasadas as 16.00 horas, a Garda Civil de Tráfico desprazouse tamén ata o municipio de Guntín. Alí, na LU-P-1611, ao seu paso pola parroquia de Vilameá, unha muller saíuse da vía co seu coche e rematou atrapada despois de envorcar.
Efectivos do GES de Friol-Palas acudiron ao lugar e excarceraron á afectada. Foi trasladada ao hospital consciente, pero con moita dor.
Foi o sistema automático do coche o que alertou ao 112-Galicia, que logo recibiu varias chamadas de particulares alertando de que viran un turismo envorcado na cuneta.