Un condutor sobrevive en Pantón tras encaixarse o seu camión contra outro que picara

Unha persoa resultou ferida este xoves en Pantón ao chocar o camión que conducía contra outro que sufrira unha picada. Ocorreu nun tramo de tres carrís da estrada N-120

O accidente tivo lugar á unha e cuarto da tarde cando o vehículo que conducía o camioneiro ferido subía dirección Ourense a costa que remata no alto de Guítara, no tramo da N-120 entre Ferreira de Pantón e Vos Peares. O primeiro camión chocou contra outro articulado que estaba detido no carril lento de subida. Ía cargado de troncos e estaba parado porque acababa de picar.

O impacto esnaquizou por completo parte dereita da cabina do camión máis pequeno. O condutor salvouse de males maiores porque a estrutura da parte esquerda non recibiu o impacto de cheo. En todo caso, na parte da cabina que quedou enteira hai o espazo xusto para o condutor.

De todos os xeitos, o ferido puido baixar da cabina polo seu propio pé e en aparencia só sufriu lesións leves.

O accidente non provocou problemas graves de tráfico na N-120, a pesar de que os dous camións implicados ocupaban dous carrís. Ao tratarse dun tramo con tres, os servizos de emerxencia foron dando paso alternativamente non houbo que cortar a estrada en ningún momento.

Ao lugar acudiron a Garda Civil de tráfico, unha ambulancia do 061 e os bombeiros de Monforte.

---

---

---