As obras da nova rede de subministración que custea Aqualia arrincan á altura de Ribas Altas
30 nov 2022 . Actualizado á 16:37 h.O Concello de Monforte informa do inicio das obras de instalación da nova tubaxe da rede xeral de abastecemento de auga. Os traballos comezaron este luns á altura do campo de fútbol de Ribas Altas, «unha vez resoltos todos os permisos e trámites previos» e «logo da chegada nestes días do material e a maquinaria necesaria». O investimento ascende a 1.700.000 euros e corre a cargo da empresa Aqualia, concesionaria do servizo de subministración municipal, coa que asinara o correspondente preacordo o alcalde, José Tomé, o pasado mes de xullo.
As obras consistirán na instalación dunha nova tubaxe xeral de fundición entre os depósitos do monte Cornado, aos que se bombea a auga desde a captación do Cabe en Ribas altas, e os que distribúen a auga ao centro urbano desde San Vicente. A actual condución, de grande antigüidade, é de fibrocemento, material máis sensible ás roturas. «Esta actuación significará un antes e un despois na mellora da rede xeral de abastecemento de auga», sinala o alcalde, ao fío do anuncio municipal.
Acordo coa empresa
«Imos resolver —engade— un problema moi importante, xa que se vai garantir que Monforte non quede sen auga potable». Tomé chegou ao preacordo coa empresa, validado posteriormente polo pleno, tras unha sentenza do Xulgado do Contencioso Administrativo Número 1 de Lugo que instaba á empresa para executar o investimento de 1.671.000 euros do plan que se comprometeu a levar á práctica no 2001 ao facerse co contrato. O fallo xudicial establecía ademais que a esta cantidade debían engadirse os gastos de demora, polo que o importe da investimento se eleva a 1.784.000 euros.
O proxecto que activa agora Aqualia contempla o desdobramento da rede xeral de distribución de Monforte. Ao concluír as obras, apunta o alcalde, «teremos dúas tubaxes, a actual e a nova, e así evitamos as reiteradas roturas na de fibrocemento, xa que a de fundición é moi difícil que teña unha avaría deste tipo». Ás dúas conducións das que disporá a rede xeral —detalla— «hai que sumar unha terceira, xa que nas proximidades de Juan Montes xa foi construído un by pass para conectar a antiga traída de Pacios de Veiga».
Sen cortes, por agora
O inicio das obras na parroquia urbana de Ribas Altas non suporá por agora, segundo o Concello, restricións no abastecemento de auga nin cortes nas rúas por onde discorre a actual condución. «Nestas actuacións iniciais non está previsto o corte de rúas nin da rede de subministro», detalla o comunicado municipal. Os traballos irán avanzando desde os depósitos do monte Cornado en dirección ao conxunto monumental de San Vicente, desde os que se deriva a auga a todo o centro urbano.
«Con esta obra resolveremos un problema moi importante, xa que vai garantir que Monforte non se quede sen auga potable. Hoxe é un día moi importante, porque sen renunciar a nada, damos o primeiro paso para cumprir os compromisos pendentes que establece o contrato entre Aqualia e o Concello», sinala Tomé.
Unha rotura na tubaxe xeral á altura de Rioseco, nun tramo no que discorre baixo a vía do tren, deixou sen subministración de auga potable durante dous días á totalidade do centro urbano de Monforte en novembro do 2017. Seis meses despois daquela grave avaría, o alcalde avanzou neste diario que Aqualia podería saldar parte dos investimentos pendentes coa instalación dunha nova traída entre o monte Cornado e San Vicente.
O alcalde fixo este anuncio en xullo do 2018, cando xa estaban en marcha as conversacións coa empresa adxudicataria. As obras de instalación da nova tubaxe coinciden agora cunha nova avaría que afecta desde o pasado domingo a vivendas do tramo fina da rúa Ourense e do barrio do Casar.
O Concello comunica, doutra banda, que este martes levarán a cabo obras de mellora da rede de abastecemento na rúa Santa Clara, concretamente á altura do número 18. Desde as nova da mañá, haberá cortes por ese motivo nas rúas Santa Clara e A Veiga, e nos camiños da Barxa e As Codesás. As obras tamén obrigarán a cortar ao tráfico Santa Clara.