Os problemas orzamentarios con que se atopa actualmente o proxecto arqueolóxico coordinado pola USC non impedirán que durante este ano síganse publicando traballos científicos para divulgar os resultados das investigacións realizadas ata o de agora nos xacementos Cova Eirós, Valdavara -no municipio de Becerreá- e no val de Lemos. Durante a primeira metade do ano está previsto que aparezan varios artigos en diversas revistas especializadas.
Entre as publicacións pendentes figuran as dos relatorios sobre as escavacións de Cova Eirós que foron presentadas no congreso da Unión Internacional de Ciencias Prehistóricas e Protohistóricas que se celebrou o pasado setembro en Burgos. Neste simposio tomaron parte preto de 2.000 especialistas de todo o mundo, o que axudou a dar unha importante difusión aos achados efectuados no xacemento de Triacastela. Os arqueólogos presentaron neste congreso dous traballos, un deles sobre as estrageias de abastecemento de alimentos e materias primas dos habitantes prehistóricos da cova e outro sobre o uso da tecnoloxía lítica.
Outros traballos
Nos últimos anos apareceron numerosos traballos científicos sobre as investigacións realizadas dentro deste proxecto. Unha parte deles apareceron en revistas especializadas como Gallaecia, Croa, Traballos de Prehistoria, Geobios ou Espazo, Tempo e Forma. Así mesmo, editáronse dous libros relacionados con este plan arqueolóxico. Un deles, To the West of Spanish Cantabria, foi publicado en inglés no Reino Unido. O outro libro, máis recente, céntrase no conxunto de arte prehistórica de Cova Eirós.