O presidente ve á UE como un grupo de «nacións en decadencia» dirixidas por «débiles», e insinúa que podería deixar de apoiar a Ucraína
10 dic 2025 . Actualizado á 21:33 h.A cruzada de Donald Trump contra Europa parece non ter fin. Despois das perlas que dedica a nova estratexia de seguridade de EE.UU. ao Vello Continente —onde se afirma, entre outras cousas, que «se enfronta á desaparición da súa civilización»—, o presidente estadounidense redobrou este martes unhas críticas que profundan a ruptura entre as dúas beiras do Atlántico. Na súa opinión, a Unión Europea é un grupo de «nacións en decadencia» gobernadas por dirixentes «débiles» que se enfronta á súa propia «destrución. Ao mesmo tempo, insinúa que podería deixar de apoiar a Ucraína e lanza un aviso a Volodímir Zelenski: «Vai ter que espabilarse e empezar a aceptar as cousas».
Nunha entrevista difundida onte por Politico —o poderoso medio estadounidense, que hai pouco o nomeou como «a persoa máis influente en Europa»—, o republicano despáchase a gusto contra os seus aliados históricos «Creo que queren ser tan politicamente correctos que non saben que facer. Europa non sabe que facer», apostila. «Acabarán cambiando a súa ideoloxía, porque a xente que chega ten unha moi diferente. E iso faralles moito máis débiles», afirma, facéndose eco da teoría conspirativa sobre a migración da ultradereita.
«Europa está a ser destruída. Tedes que entendelo: quero unha Europa forte. Cando deixan entrar a millóns de persoas, moitas destas persoas acaban cometendo crimes atroces». Para iso pon como exemplo a Suecia: «Pasou de ser un país libre de delitos a un que agora ten moita criminalidade». «Se Europa segue así, moitos dos seus países deixarán de ser viables», vaticina. Trump exemplifica esa deriva no primeiro alcalde musulmán de Londres, Sadiq Khan. «É horrible, noxento, un incompetente vicioso. Votáronlle porque chegou moita xente nova», opina.
Entre os principais culpables da situación actual, Trump pon na diana á excanciller alemá Angela Merkel, á que acusa de cometer dous grandes erros nas súas políticas «en inmigración e enerxía». Ao tempo non dúbida en lembrar a súa aposta por candidatos que «non gustaban aos europeos». «Apoiei a Viktor Orbán. En América Latina, a [Javier] Milei. Ía perdendo, e ao final apoieino e gañou por goleada», congratúlase.
Por se fose pouco, o mandatario republicano critica que Europa «non sabe negociar» no terreo comercial e que se dedica a pór todo tipo de trabas burocráticas. A ese respecto, o luns tachou de «noxenta» a multa de 120 millóns de euros que Bruxelas impuxo á rede social X, considerada unha afronta contra as grandes firmas tecnolóxicas estadounidenses e que provocou tamén a airada resposta do seu propietario, Elon Musk, que chamou a «abolir» a UE e a equiparala co réxime de Hitler.
«Zelenski está a perder»
Preguntado pola invasión de Ucraína, o republicano non titubea. «Rusia está nunha posición máis forte para negociar e ten as de gañar», afirma na conversación con Politico, o cal non lle impide recoñecer «a valentía da loita dos ucraínos». Iso si, Trump está convencido de que, «ao final, xeralmente o tamaño imponse e Rusia é moito máis grande».
Precisamente por esa razón pensa que «Zelenski, debe empezar a aceptar algunhas cousas, porque está a perder a guerra» e, nalgún momento, Europa «deixará de apoiar» a Kiev. Tamén recomenda ao líder ucraíno convocar eleccións, unha idea que Vladimir Putin non deixou de repetir. «Fai moito que non hai eleccións. Falan de democracia, pero chega un punto en que xa non é unha democracia», apostila Trump sobre Zelenski, quen negou que pense ceder territorio a Moscova e ameaza con devolver o plan de paz norteamericano a unha rúa sen saída.
O chanceler alemán, Friedrich Merz, cualificou este martes de «inaceptables» unha boa parte das afirmacións que contén a nova estratexia de seguridade da Administración Trump. «Algunhas cousas son comprensibles, outras son entendibles, pero outras son inaceptables para nós desde o punto de vista europeo», declarou o político conservador en referencia ao documento de Washington. «Non vexo ningunha necesidade de que os estadounidenses queiran agora salvar a democracia en Europa. Se fose necesario salvala, nós sós poderiamos facelo», afirmou.