Mogherini, ex xefa da diplomacia da UE, entre os tres detidos por
por presunta fraude de fondos comunitarios
INTERNACIONAL
A Fiscalía Europea rexistrou edificios do Servizo de Acción Exterior da Unión e do Colexio de Europa por «fortes sospeitas» de irregularidades durante o procedemento de licitación dun programa de formación de mozos diplomáticos durante a etapa de Josep Borrell
02 dic 2025 . Actualizado á 23:10 h.Bruxelas volve verse salpicada por supostos supostos delitos de figuras de peso das institucións comunitarias. A operación levada a cabo este martes pola Policía belga, con rexistros nas sedes do Servizo Europeo de Acción Exterior (SEAE) e o Colexio de Europa, e tres detencións por presunta fraude ligada á creación dun programa de formación financiado con fondos da UE. Esta investigación fixo rememorar o caso Catargate, o escándalo que hai tres anos destapou supostos subornos de Catar e Marrocos a eurodeputados e á entón vicepresidenta da Eurocámara, Eva Kaili. Os tres detidos, segundo os medios belgas, son Federica Mogherini, ex xefa da diplomacia da UE; o diplomático italiano Stefano Sannino, exnúmero dous de Josep Borrell no SEAE, e un directivo do Colexio de Europa sen identificar.
Os tres atópanse baixo custodia policial despois dos rexistros, realizados a pedimento da Fiscalía Europea (EPPO), que solicitou e conseguiu que se levantase a inmunidade a «varios sospeitosos» para proceder coa redada e as detencións.
Corpo diplomático
O SEAE (órgano xestor da diplomacia europea) foi dirixido ata o 2019 por Mogherini, actual reitora do Colexio de Europa, unha escola de formación para futuros diplomáticos da UE. Sannino foi secretario xeral do SEAE entre o 2021 xaneiro do 2025 e, actualmente, é o director xeral para Oriente Medio, Norte de África e a rexión do Golfo na Comisión.
As autoridades belgas, apoiadas tamén pola Oficina Europea de Loita contra a Fraude (OLAF), están a investigar un programa de formación para mozos diplomáticos comunitarios, coñecido como a Academia Diplomática da UE, adxudicado para a súa xestión ao Colexio de Europa, unha institución privada. Durante a etapa analizada, entre o 2021 e o 2022, o SEAE estivo dirixido polo exministro español Borrell.
No seu comunicado, a EPPO, encargada de investigar e perseguir delitos contra os intereses financeiros da UE, dixo que existen «fortes sospeitas» de que se vulneraron normas europeas sobre «competencia desleal» cando o SEAE adxudicou a licitación ao Colexio de Europa para a creación desta academia.
A investigación analiza se a escola recibiu información sobre os criterios de selección do proceso de licitación antes de que se fixese público o aviso oficial. A fiscalía asegurou que os feitos «poderían constituír fraude na contratación pública, corrupción, conflito de intereses e violación do segredo profesional».
O portavoz de Exteriores da Comisión Europea, Anitta Hipper, confirmou os rexistros como parte dunha «investigación en curso sobre actividades que tiveron lugar no mandato anterior», é dicir, antes de que a presidenta do Executivo comunitario, Ursula von der Leyen, fose reelixida o pasado decembro.