Primeira portería a cero do Celta no Bernabéu desde o ano 1977, con Fenoy baixo paus
BANCADA DE RÍO
Radu logra por segunda vez esa tempada rematar un partido de liga sen encaixar gol
08 dic 2025 . Actualizado á 09:28 h.Se gañar no Santiago Bernabéu xa é para o Celta un feito extraordinario, facelo coa portería a cero é tan inusual que non sucedía desde o ano 1977 cando os vigueses asinaran un empate a cero goles con Carlos Alberto Fenoy -o gardameta lembrado por lanzar penaltis á parte de tratar de paralos- baixo os paus dun conxunto vigués que tamén aguantara o asedio. Ademais, ao longo da súa dilatada carreira, é o primeiro triunfo de Iago Aspas ante o Real Madrid en liga tras 2 empates e 19 derrotas; si o lograra en Copa, para acceder ás semifinais do 2017 con Eduardo Berizzo a cargo do equipo.
Aquel empate puña fin a 18 visitas consecutivas do Celta aos brancos saldadas con vitoria local. O empate chegaba o 13 de marzo de 1977, na xornada 26 e o cadro branco estaba comandado por Miljanic. A cargo do Celta estaba o técnico Carmelo Cedrún, que a semana pasada cumpriu 95 anos, e entre os titulares daquel partido estaban imprescindibles da historia do Celta como Manolo, o Gran Capitán recentemente desbancado por Aspas como o céltico con máis partidos, ou Juan Fernández Vilela.
É a segunda portería a cero que logra o porteiro titular en liga do Celta, Ionut Andrei Radu, e foron en dúas saídas consecutivas, pois o lograra tamén dúas semanas antes, fronte ao Alavés en Mendizorrotza; previamente, aínda que asinara moi boas actuacións, non tivera ese premio. En Europa League, o único encontro sen encaixar ata o de agora foi free ao Dinamo de Zagreb, con Iván Villar baixo paus pola escordadura do porteiro internacional romanés no dedo polgar, que lle fixo perderse tamén o duelo ante o Porto de Vega, onde tampouco encaixou o equipo.
