A presidenta do Celta asume que teñen que reducir a cantidade que necesitan vender e a clasificación continental habitual é unha das vías
02 dic 2025 . Actualizado á 05:00 h.A presidenta do Celta, Marián Mouriño, asume que «é unha responsabilidade xestionar un presuposto cada vez máis alto», en referencia aos 124 millóns aprobados na xunta de accionistas. No entanto, queda co positivo que implica: «Significa a ilusión da xente, do celtismo, dos accionistas que apoian o crecemento do club no cal estamos a traballar todos».
En canto a que se contemple vender por 32 millóns de euros e como o vai xestionar o club, a máxima mandataria da entidade argumenta que o veñen facendo nas últimas tempadas e «foi ben», co cal seguen na mesma liña. «Tratamos de aumentar ingresos, xa sexa vía Europa, como comentaba Miguel Ángel (Amo, o director financeiro), ou xa sexa por redución de gastos. Todo o que sexa mellorar o exercicio vai supor a que haxa menos necesidade de venda e, despois, seguiremos resolvendo cos mercados como se vaian dando».
Cuestionada por se non son moito 32 millóns, acepta que si. «Sempre é moito, é unha cantidade que o club debe empezar a reducir e estamos a traballar en iso», pero entendendo que a presente tempada non era o momento de reducir en persoal. «Había que manter o bloque, incluso superar ese gasto deportivo para manter e afrontar estas tres competicións. Pero a idea é estar sempre en Europa ou reducir un pocou para non ter que vender por esas cantidades», afirma.
Mouriño afirma que nos plans do club non está facer ningunha venda no mercado de inverno. «A nosa prioridade é manternos nas tres competicións, chegar o máis lonxe posible. Non estamos a pensar agora mesmo en ningunha venda», asegura. No entanto, tamén lembra o imprevisible do mercado. «Sabedes como son os mercados, explicábao Marco (Garcés) con Douvikas. Iamos xa para casa ás tres da tarde, chámame e dime: ‘Vamos á sede, que temos unha operación'», lembra. É o exemplo de que «non se pode planificar máis que a estratexia» e insiste en que «a prioridade é manter o bloque, competir e non desmontar nada. A partir de aí os mercados pasan moitas cousas».
Cando se lle pregunta por posibles incorporacións, incide en que a porta sempre está aberta para canteiráns que queiran retornar, pero partindo de que «non hai fichas» e todo pasa polas saídas. No caso concreto de Fer López, pon o foco en que non é un xogador seu e dependerá del, os seus axentes e as decisións que se adopten.
Non teñen previsións actualizadas do que ingresarán pola Europa League, pero si confirma que superaron a previsión da liga cos seus tres triunfos.