Garcés, o director deportivo, impartiu maxisterio sobre o mercado do Celta a partir da venda de Fer López; o mexicano tocou todos os paus
02 dic 2025 . Actualizado á 05:00 h.«Que fixeches co diñeiro das vendas, Marco?». A pregunta podería ser o enunciado de calquera conferencia sobre o mercado no mundo do fútbol. Garcés, o director deportivo do Celta, deu unha onte na xunta xeral de accionistas. Didáctica e amena ao mesmo tempo.
Marco explicou, en primeiro lugar, que unha parte considerable do límite salarial é un préstamo que os clubs deben devolver a final de tempada, antes do 30 de xuño, de aí a necesidade das vendas. Por ese camiño, e detallando todos os movementos do pasado verán, veu a saída de Fer López. «Non estaba previsto vendelo, tiñamos outras alternativas, pero chegou o seu representante cunha grande oferta para as dúas partes e fíxose a operación», lembrou o mexicano, que para entón xa pechara a chegada de Ilaix Moriba en propiedade e a fichaxe de Ionut Andrei Radu.
O dirixente tamén indicou que, máis aló do aspecto económico, o club tamén debe xerar fiestras facendo sitio para os xogadores que veñen empurrando forte. O do romanés foi, así mesmo, unha fichaxe de laboratorio: primeiro, estudaron por onde encaixaba o Celta: centros, remates de cabeza e tiros de media distancia. Dos goles encaixados a tempada pasada, 6,7 eran evitables en función das métrica. Con estes datos puxéronse a buscar un porteiro de rendemento inmediato entre os equipos que ían descender «porque é máis doado sacalo e porque son dos máis atacados». Fixáronse en Radu, vírono en directo e o 4 de xuño xa era propiedade celeste.
Tamén lle explicou aos accionistas as fichaxes de Ferran Jutglá e a cesión de Bryan Zaragoza. O catalán, porque podía cubrir arriba as vacantes de Alfon e Tasos Douvikas, ofrecía rendemento inmediato, «era titular nunha liga similar á española e ao estar en último ano de contrato, o club tiña que negociar». A aposta polo andaluz foi para gañar en «verticalidade, un contra un e centros perigosos». Os dous, a priori eran de rendemento inmediato. Logo chegou a operación de Borja Iglesias, con grandes cesións por todas as partes, e na recta final de mercado, dedicáronse a defenderse dos «bombazos» que foron chegando, porque desde o principio o grande obxectivo foi «conservar o bloque». Para rematar, indicou que o Celta é o cuarto equipo con máis minutos de canteiráns en Europa metendo neste saco a 13 xogadores do cadro de persoal actual.
Os xogadores africanos
Na conferencia de Marco Garcés, a Celta Fortuna tamén tivo un amplo despregamento. Lembrou que 14 canteiráns están a ser relevantes, que sete xuvenís tiveron minutos en Primeira RFEF e, a continuación, falou do mercado africano que está a explorar o Celta. «Estes xogadores veñen para as posicións onde non fomos capaces de desenvolver na casa os xogadores dunha determinada xeración en particular. Non tapamos o desenvolvemento dos de casa», deixando claro que estes mozos veñen cubrir un baleiro, non o sitio dos canteiráns da factoría da Madroa.
Sistema de bonos na base
Garcés tamén falou do método de pago implantado para os canteiráns. Estableceron un sistema de bonos en función de rendemento de cada tempada que se aplica na próxima. O criterio é para todos, non hai distincións.
O balón parado
Para rematar, o director deportivo falou do traballo que están a realizar na base para cortar a sangría do balón parado. Contan con dous especialistas na canteira para traballar este aspecto desde a base, co fin de que logo produza efecto arriba.
Cada gol son puntos: «Levamos 16 goles e temos 16 puntos»
Marco Garcés, o director deportivo, utilizou unha as súas típicas gráficas para explicar que cada gol a favor ten o seu equivalencia en puntos, sendo o mellor exemplo a situación actual do equipo. «Temos 16 goles e levamos 16 puntos», lembroulle ao auditorio, engadindo a continuación que para garantir Europa todos os anos necesitarían marcar 62 goles, unha cifra que non está ao alcance de moitos. O director deportivo tamén mostrou o seu convencemento de que asinarán un bo ano.
Carlos Cao: «Celta360 levará ao club a outra dimensión»
Carlos Cao, o director de Infraestruturas e Relacións Institucionais do Celta, incidiu na idea de que o proxecto Celta360 «é ou máis importante na historia do club e situará ao Celta noutra dimensión», confirmando o inicio das edificacións e dando conta dos traballos arqueolóxicos realizados grazas ao convenio coa Universidade de Vigo e que permitiron recuperar 7.000 pezas.
As Celtas, un proxecto autosuficiente no económico
Humberto Lede, o coordinador dAs Celtas, destacou ante os accionistas que o proxecto do fútbol segue a filosofía do club na súa aposta pola base e que está pensado para ser autosuficiente: «A determinación é chegar ao fútbol profesional e facelo sufragando vos seus gastos».