O Celta quedou cunha defensa de catro xogadores no inicio do segundo acto e rematou con outros tantos dianteiros, pero sen marcar en 16 intentos
13 abr 2025 . Actualizado á 05:00 h.Claudio Giráldez intentou cambiar o partido fronte ao Espanyol a través do caderno. Se tanto no encontro de Cornellá como no primeiro tempo de Balaídos, Manolo González gañáralle a partida ao do Porriño co seu método tradicional de orde e transicións, na segunda metade, o adestrador do Celta tratou de sorprender pasando a xogar cunha liña de catro defensas, con Javi Rodríguez e Marcos Alonso nos laterais, e Jailson e Carlos Domínguez como centrais, o que implicaba adiantar a posición de Sergio Carreira e de Óscar Mingueza nos costados.
Con esa idea, chegou o segundo tanto do Espanyol, no que fallaron as dúas centrais de emerxencia, e co 0-2, o preparador céltico renovou a súa fronte de ataque e rematou xogando con catro futbolistas coa bitola de dianteiros: Alfon pasou a xogar na banda dereita,Williot Swedberg fíxoo no lado esquerdo e Fer López e Pablo Durán, por dentro. No centro do campo, unicamente habitaban Fran Beltrán e Ilaix Moriba, ademais dos defensas que participaban na recuperación do balón.
Deu igual, porque nesta ocasión, o conxunto vigués quedou a cero a pesar de disparar en 16 oportunidades á portería contraria, das cales seis foron entre os tres paus, pero ningún dos tiros perforou a portería de Joan García, que fixo dous excelentes paradas. Pola contra, o Espanyol marcou en dous dos seus tres intentos. Vicente Guaita só fixo unha intervención no partido.
Alfon González, que encadea cinco encontros sendo da partida, foi o xogador que máis o intentou, ata en catro ocasiones, seguido Mingueza, Pablo Durán e Fer López, con dous. O xogador con ficha do B foi o máis incisivo de todos.
