O adestrador do Celta asume a responsabilidade da derrota ante o Espanyol e engade que o darán todo nos partidos que quedan «para conseguir un soño»
12 abr 2025 . Actualizado á 21:45 h.O adestrador do Celta, Claudio Giráldez, pide «calma e tranquilidade» tras a derrota sufrida este sábado ante o Espanyol porque seguen dependendo de si mesmos para entrar en Europa. «Vénnos ben pór os pés na terra e ver que somos vencibles, que se non estamos perfectos, calquera equipo pódeche vencer. Sabiamos que o Espanyol sería o rival que máis complicado íanolo a pór dos oito que quedaban polo seu xeito de competir e pola excelencia que tes que ter para facerlle dano a un equipo tan ordenado», afirmaba en rolda de prensa.
O técnico celeste revelou que Ilaix Moriba non arrincou como titular porque tivera unha molestia na última sesión previa ao encontro, xa que se expuña repetir o once que aliñou ante o Mallorca porque, ao seu entender, o Espanyol ten un armazón defensivo parecido ao equipo bermellón. «Xeramos ocasións, estivemos preto de revertelo e non baixamos os brazos ata o final. O equipo xogou un partido moi parecido contra o Mallorca e gañamos. Entón diciamos que todo estaba moi ben exposto», comentou. Está orgulloso do equipo aínda que o resultado non acompañase e asume que «moita parte da responsabilidade» de perder é súa, máis o mérito do riva: «É un cúmulo de cousas, hai días que non sae e hoxe non saíu».
Incidiu en que sabían que sería un partido de poucas ocasións, e considera que de estar precisos, podían incluso gañalo 3-0. «Foi parecido ao da ida, facendo cousas moi distintas: xogando de catro, buscando outros xeitos de ocupar o espazo, defendendo de xeito distinto», enumeraba. Con todo, cre que o rival fixo «un bo primeiro gol» que pilla longo ao seu equipo demasiad longo, recompóndose ao pouco da entrada de Carlos Domínguez. «No segundo, nunha acción hipertabajada, sabiamos que ían xogar directos sobre Roberto, non estivemos contundentes nun dous para un», tendo logo ocasións, paus tiros, rexeites e balón parado para facer dano. «Volvémonos demasiado tolos, desordenándonos, cun xogo máis atropelado».
Sobre a lesión do central Carl Starfelt, que tivo que ser substituído no minuto 12, dixo que a impresión do propio xogador é que non parece grave porque «soubo parar a tempo». Tamén revelou que fora, xunto con Ilaix, o outro xogador que se resentiu no adestramento do venres. Decidiu arriscar con el e considera que se equivocou, como noutras decisións do partido. Pero tamén afirma que sabe en que cuestións cometeu eses erros e tamén ten claro que facer para tratar de gañar no campo do Barcelona.
O porriñés tamén saíu en defensa do canteirán Carlos Domínguez, que tivo que saír en lugar de Starfelt e non tivo un bo día. «Metinlle o marrón de xogar na dereita en saída de catro. Ten un gran nivel, demostrouno en moitos partidos. Non é sinxelo mantelo cando non estás a xogar e fixo moitas cousas ben. A responsabilidade é miña». Parte da base de que non era doado sumarse co partido empezado e que «calquera futbolista que estea a xogar asiduamente ten máis ritmo e competitividade que outro que participe menos».
Finalmente, mandaba unha mensaxe ao celtismo: «Debemos manter o estado de alegría e ilusión que tiñamos antes deste partido porque estamos sétimos. Non sei que máis podemos pedir. Esta derrota tennos que doer, o máximo responsable son eu, pero imos seguir xogando igual». Sostén que é o xeito na que creen, desde o respecto a todas as demais e subliña que seguirán pelexando: «Imos dalo todo nestes sete partidos para conseguir un soño». Cada equipo ten a súa forma de xogar e el vai coa súa «a matar», sostén.
