Como cada mes de agosto, o Celta abre as portas da súa casa para disputar o Memorial Quinocho. Conxuntos como o Mainz ou Udinese xa se mediron ao cadro vigués no coñecido torneo estival. O invitado desta edición é o Lazio. O persoal dirixido por Simone Inzaghi visita Vigo para disputar o primeiro partido no céspede de Balaídos, o que é sinónimo de últimos preparativos antes do inicio ligueiro.
Desde a súa chegada ao banco en abril do 2016 pola destitución de Stefano Pioli, Simone Inzaghi -ex dianteiro lacial e irmán da lenda rossonera «Pippo» Inzaghi- aterrou sen experiencia no fútbol profesional xa que dirixía ao equipo Primavera. Iso si, chegou para quedarse e afronta a súa cuarta tempada completa a cargo dun dos grandes do calcio italiano. Simone retirouse na Lazio, lugar no que empezou a súa carreira como adestrador e aínda permanece.
Inzaghi foi modelando o persoal durante estas tempadas e no actual mercado de fichaxes incorporou catro futbolistas -Jony (ex do Alavés), Lazzarri, Denis Vavro e Adekanye- cun gasto duns 23 millóns de euros. O investimento é discreta para os tempo que corren pero a Lazio non se caracteriza por realizar grandes desembolsos. O atractivo deportivo que propón Simone anteponse ao económico, e os dous títulos conseguidos ata o de agora na era Inzaghi son o principal aval do técnico. Unha Supercopa fronte á Juventus e unha Copa de Italia este mesmo ano contra o Atalanta son o resultado do seu bo facer. De todos os xeitos, a espiña cravada do conxunto é estar á sombra da Roma e non acceder a Liga de Campións desde a tempada 2014/2015, aínda que a consecución da Copa parece reavivar as esperanzas.
Os da capital presentan un esquema practicamente inamovible para Inzaghi: un clásico no calcio como o 3-5-2. A importancia desta formación recae nas bandas con dúas carrileros con amplitude, percorrido e calidade en situacións de ataque como son Lulic e Marusic. Outra apartado clave do sistema son as figuras do medio do campo, en especial Lucas Leiva e Milinkovic-Savic, quen achega equilibrio e dureza á medular. A partir de aí a Simone gústalle contar con xogadores cunha faísca de creatividade, aqueles que marcan a diferenza nos últimos metros e aos que lles dá unha maior liberdade a partir de tres cuartos de campo. Estes futbolistas son Joaquín Correa, Ciro Immobile e o ex sevillista Luis Alberto, tres antigos coñecidos por xogar na liga española, do mesmo xeito que o ariete ecuatoriano Felipe Caicedo. En definitiva, pretende afianzar a zaga cunha liña de tres e outro trío de mediocentros de corte máis defensivo por diante, dar liberdade ás bandas con carrileros amplos e apostar pola calidade na parte de arriba.
A estrela do equipo lacial é o hispano-serbio Sergej Milinkovic-Savic. Aínda que o mediocentro de 24 anos completou unha tempada irregular, o seu rendemento hai dous anos segue valendo para estar nas axendas de xigantes de Europa como o Manchester United. Aínda así, desde a prensa italiana indican que a renovación coa Lazio está a piques de ultimarse. Ademais, visitará Balaídos o antigo bético Riza Durmisi. O danés foi o principal pretendente a ocupar o lateral esquerdo no pasado mercado invernal, aínda que finalmente chegou Lucas Olaza.
