O Celta preséntase en Balaídos ante o Lazio no último ensaio antes de recibir ao Real Madrid en liga e coa misión de disipar as dúbidas no dobre pivote, os centrais e o acompañante de Aspas
10 ago 2019 . Actualizado á 05:00 h.O Celta bota o pano á pretemporada coa presentación ante o seu público (20 horas) no Memorial Quinocho co Lazio, campión da Copa de Italia, como rival nun test con aroma a ensaio xeral para a tempada a unha semana vista de recibir ao Real Madrid no primeiro partido de liga. O de hoxe, ademais, é o primeiro dos tres sábados seguidos de agosto con fútbol en Balaídos, aínda que nesta ocasión coa bancada de Río pechada por motivos de seguridade segundo a directrices do Concello. Será a primeira vez que Denis Suárez xogue en Balaídos coa elástica celeste.
O dobre pivote concentra as miradas na antesala da liga. Escribá sabe que non poderá contar con Okay Yokuslu, o único pivote defensivo puro do persoal, ao non disputar un só partido de pretemporada, e tampouco se intúe que vaia ter substituto antes do 17 de agosto. Iso significa que o adestrador valenciano terá que desafiar ao Real Madrid cun dúo con máis calidade que músculo. Stanislav Lobotka parece fixo e resta por saber se Beltrán ou Jozabed serán a súa parella de baile. Do ensaio desta tarde quizais xa se poidan extraer conclusións.
A zona de ataque, e dando por feito que o 4-4-2 será a aposta táctica despois de ser o único debuxo utilizado durante todo o verán, é outro foco de atención porque a Iago Aspas fóronlle caendo os socios polo camiño. O moañés, que regresa despois do susto de Berlín, xa sabe que non terá a velocidade de Santi Mina ao seu lado e incluso hai dúbidas co Toro Fernández, que xa leva unha semana no Uruguai e só xogou un partido amigable (ante o Lugo o primeiro tempo o pasado 27 de xullo). O dianteiro charrúa debe estar de regreso en Vigo ao longo da fin de semana.
Este escenario incluso abre a porta a Claudio Beauvue, que despois de dúas cesións (Leganés e Caen) non xogou partido ningún vestido de celeste pero que podería recibir o indulto e loitar por unha nova oportunidade. A día de hoxe Escribá debe elixir entre o caribeño (se ten o permiso do club) ou un dos xuvenís que seguen na dinámica do primeiro equipo: Lauti ou Iker Losada.
A terceira dúbida aparece no centro da defensa. Aquí non por falta de efectivos, senón pola combinación que vaia saír gañadora das probas. En teoría os internacionais Aidoo e Araujo parecían partir con vantaxe, pero chegaron tarde polos seus compromisos internacionais e tanto Costas como Jorge Sáenz xa tomaran posicións e unha das cousas máis destacables do verán é que o equipo só encaixou dous goles nos cinco partidos disputados.
E aínda que se trate do período estival tampouco está de máis ver como reacciona o equipo despois da primeira derrota tras catro partidos encadeando resultados positivos.
Todo ante un rival que está clasificado directamente para a fase de grupos da Europa League despois de gañar a copa do seu país e que non coñece a derrota en pretemporada. Cinco vitorias consecutivas e todas elas marcando catro ou máis goles. Unha boa mostra do seu potencial para pór a proba a un Celta ilusionante (e canteirán) que non gaña o seu trofeo de presentación desde o 2016. Udinese e Mainz 05 impedíronselle dous os últimos anos.
