José Tomé seguirá como presidente en funcións da Deputación de Lugo ata o día 30 de decembro
GALICIA
Defende a súa inocencia e confirma que seguirá como deputado non adscrito e como alcalde de Monforte. O BNG xa non acudiu hoxe á comisión de goberno provincial
12 dic 2025 . Actualizado á 17:49 h.José Tomé seguirá como presidente en funcións da Deputación de Lugo ata o 30 de decembro, cando se celebre o pleno ordinario, e ademais confirma que seguirá como deputado non adscrito e como alcalde de Monforte de Lemos, a pesar de que tanto o PSOE como o PSdeG lle pediron que entregase as súas actas. O ex dirixente do PSOE formalizou na mañá deste venres, 12 de decembro, a súa renuncia ao cargo da Presidencia da Deputación de Lugo despois das acusacións de presunto acoso sexual que denunciaron varias militantes do PSOE. Tomé presentou este mediodía o correspondente escrito de renuncia no rexistro da institución provincial, pero oficialmente non deixa o cargo ata que a corporación o vote no pleno. De momento, esta mañá, Tomé presidiu a comisión de goberno, da que se ausentaron os seus socios do BNG e o deputado socialista José María Arias.
Segundo explican fontes do goberno provincial, de acordo co disposto no artigo 52 do Regulamento Orgánico da Deputación de Lugo, a renuncia á Presidencia deberá ser aceptada polo Pleno da Corporación, que se celebrará o martes 30 de decembro, momento a partir do cal a Presidencia quedará formalmente vacante. Mentres tanto, Tomé Roca exercerá como presidente en funcións, tal e como está legalmente establecido.
Indican que a partir do 30 de decembro, será o vicepresidente provincial, o nacionalista Efrén Castro, quen asuma a totalidade das funcións ata o día en que a Corporación elixa un novo presidente ou presidenta. Aínda así, esta mañá Castro e os outros dous deputados do BNG pediron ao PSOE que axilizase os prazos e presentase un pleno extraordinario, para evitar chegar ata o día 30. Está por ver que medida adoptarán os nacionalistas ante o anuncio de que o pleno será a final de mes.
De momento, o grupo provincial do BNG confirmou que non participará en órganos de goberno «ata que non se concrete a demisión» e esixiu ao Partido Socialista a convocatoria dun pleno extraordinario para facela efectiva. Os nacionalistas non poden pedir un pleno extraordinario para forzar a marcha de Tomé xa que se necesita un cuarto do plenario, algo que o BNG non ten (son 3 deputados de 25). Ademais, a potestade para convocar ese pleno é do presidente provincial e ten 15 días para facelo. Está por ver se os nacionalistas dan o paso de irse antes do día 30 ou prefiren agardar acontecementos, á espera de que o PSdeG nomee a unha xestora coa que poder establecer un diálogo.
O vicepresidente Efrén Castro demandou aos socialistas dár «pasos politicamente para non alongar un sinsentido que prexudica a todas e todos e especialmente a esta situación» y reiterou na súa declaracións «o apoio ás vítimas que denunciaron nas canles internas do PSOE situacións de acoso sexual».
Segundo establece literalmente o artigo 53 do citado Regulamento, vacante a Presidencia, procederase á convocatoria da sesión extraordinaria para proceder á elección de presidente ou presidenta, que haberá de celebrarse o décimo día hábil ás doce horas». En aplicación desta previsión normativa, o pleno extraordinario para a elección do novo presidente ou presidenta celebrarase o mércores 14 de xaneiro, ás 12.00 horas.
A partir dese momento, José Tomé Roca continuará exercendo as súas funcións como deputado provincial, de acordo co previsto no propio artigo 52 do Regulamento Orgánico, que permite a renuncia ao cargo de presidente sen perda da condición de membro da Corporación.
«A Diputación de Lugo informará puntualmente dos seguintes pasos institucionais que se produzan ao abeiro deste procedemento, conforme ao marco normativo vixente», remata o comunicado do goberno provincial.
Tomé defende a súa inocencia e confirma que seguirá como deputado e como alcalde de Monforte
Nun longo escrito de renuncia, José Tomé sinala que para «salvagardar o correcto funcionamento da Institución, que se viu alterado, nos últimos días pola difusión pública de acusacións cara a miña persoa, carentes do máis mínimo sustento fáctico, xurídico e probatorio, e que foron formuladas a marxe de calquera procedemento con garantías (...) esixe que, pola miña parte, se adopten decisións persoalmente moi difíciles, que garantan que o funcionamento da Deputación Provincial de Lugo, non se vexa alterado por cuestións alleas ao estrito cumprimento das súas propias competencias».
Tomé explica que non existe procedemento penal, administrativo ou de calquera outro tipo en trámite contra a súa persoa, nin dilixencia xudicial, disciplinaria ou fiscalizadora que, conforme á legalidade vixente, «permita derivar indicio algún de irregularidade ou de conduta inapropiada, o que fai que me atope nunha situación de absoluta indefensión, xa que descoñezo cales son os feitos dos que se me acusa e as probas en que esos presuntos feitos se basearían».
O mandatario provincial en funcións sinala que se están vulnerando os seus dereitos constitucionais «así como o meu dereito á honra, á intimidade persoal e familiar e á propia imaxe». Por todo expor, sinala, que adopta «voluntariamente la dolorosa decisión de renunciar ao meu cargo de presidente», e explica que a renuncia «non implica, en absoluto, recoñecemento de responsabilidade administrativa, ética ou penal».
E remata o seu texto de renuncia manifestando que «foi un grandísimo honor dedicar estes anos da miña vida a servir aos intereses da provincia de Lugo» e defende que o seu traballo como presidente se fixo «con total transparencia e respeto absoluto aos principios éticos e dereitos constitucionais de cantas persoas compartiron comigo estes anos».