Sanidade investirá 100 millóns nunha terapia CAR-T para tratar a 250 pacientes de mieloma múltiple
GALICIA
É o segundo tumor hematolóxico máis frecuente en Galicia
29 sep 2025 . Actualizado á 17:21 h.Sanidade destinará 100 millóns de euros á compra dunha nova terapia CAR-T, un tratamento consistente en alterar xeneticamente as células para que combatan os tumores. A súa finalidade é tratar a 250 pacientes adultos con mieloma múltiple, o segundo cancro hematolóxico máis común en Galicia, segundo confirmou este luns Alfonso Rueda.
O presidente da comunidade fixo ese anuncio na súa comparecencia habitual tras o Consello da Xunta, no que se aprobou o investimento. Rueda estivo acompañado do conselleiro de Sanidade, Antonio Gómez Caamaño, quen detallou os datos dun informe sobre o plan de compra centralizada do Servizo Galego de Saúde.
Caamaño explicou que ese mecanismo aforrou 65 millóns de euros en tres anos, grazas ao uso de economías de escala, á redución na dispersión de custos ou á posibilidade de buscar mellores condicións nos contratos de compra. O resultado é a citada redución de custos que, engadiu o conselleiro, permite á súa vez investir en novas tecnoloxías e en fármacos de última xeración, como é o caso da nova terapia CAR-T.
A terapia
A CAR-T é unha terapia desenvolvida por un grupo de investigación do Institut de Recerca de Sant Pau (IR Sant Pau) de Barcelona, en colaboración co Hospital de Sant Pau e o Institut de Recerca contra a Leucèmia Josep Carreras. Un traballo investigador liderado polo galego Javier Briones e que demostrou unha «alta eficacia» en pacientes con linfoma CD30+ refractario.
É a terapia que revolucionou o tratamento contra o cancro, a través dun tratamento combinado de inmunología e enxeñería xenética. Segundo informou no seu día o IR Sant Pau nun comunicado, «promove a expansión de células T de memoria», o que, tal e como explicaron, tradúcese en «respostas duradeiras e unha mellor evolución clínica nos pacientes tratados».
Xa no 2019, o Servizo de Hematoloxía do Hospital Clínico Universitario de Santiago (CHUS) formalizou a creación dun grupo multidisciplinar para empezar a traballar con este procedemento. Aínda que o primeiro tratamento a un galego tivo que agardar un par de anos máis. Foi no 2022, a José Manuel Budiño, afectado por un linfoma non Hodgkin, un tipo de cancro do sistema linfático. «Volvín nacer», declarou dous anos despois de recibilo.