Agarda que pase a disposición xudicial o xoves
13 ago 2025 . Actualizado á 14:09 h.Continúa a investigación pola morte por arma de fogo o domingo dun home de 44 anos en Mesía. A Garda Civil acaba de deter a unha persoa en relación a estes feitos e mantén o segredo de sumario. Agarda que ao longo do día de mañá pase a disposición xudicial.
O suceso ocorreu pasadas as cinco da tarde do domingo nunha vivenda unifamiliar en Visantoña. Alí estaban só dous homes, o xa falecido e o neto da propietaria da casa, un mozo duns 35 anos. Foi este quen deu a voz de alarma do sucedido.
Unhas horas antes, estivo a tomar algo el só no bar Centro, a escasos 250 metros da súa vivenda. Tras a consumición, marchou á súa vivenda. Ao mesmo bar volveu despois de que se producise o disparo. Chegou desencaixado, moi nervioso, comentou que algo grave sucedera e pediu a un veciño que o acompañase ao seu domicilio. Foi este home o que lle cominou a que alertase aos servizos de emerxencia ante a magnitude do suceso.
O falecido é Óscar Pallas Gómez, veciño do lugar da Cruz, en Lesta, que estaba casado e tiña unha filla. Traballaba recollendo residuos urbanos para a empresa Cerceda Sol e era o que manipulaba a varredora no núcleo de Ordes.
Noticia en proceso de ampliación