No que vai de ano, as terminal de Vigo e A Coruña suman viaxeiros e voos, mentres que o de Santiago pecha un mes máis en números vermellos
12 ago 2025 . Actualizado á 14:37 h.Máis de 3,2 millóns de pasaxeiros en algo máis de 31.000 voos ata o mes de xullo. Ese é o balance dos tres aeroportos galegos que publica nun informe deste martes Aena, no que hai dúas terminal que suman cifras positivas (as de Peinador e Alvedro), mentres que o maior aeroporto galego, o de Santiago-Rosalía de Castro, perde tanto viaxeiros como operacións.
Ata xullo, os aeroportos de Vigo e da Coruña gañaron pasaxeiros, un 10,3 e un 4,3%, respectivamente, mentres que o de Santiago perdeu ata un 13,3%. Respecto ao número de operacións, Alvedro suma ata un 12% máis (preto dos dez mil voos), e Peinador un 9,4% máis (con 7.000). En Santiago, entre saídas e chegadas, operaron preto de 15.000 voos durante estes sete meses, un 7% menos que hai un ano. Con todo, se se atende unicamente ao mes de xullo, só a terminal da Coruña gana tanto en número de viaxeiros e de operacións.
O aeroporto de Santiago-Rosalía de Castro pechou o seu balance durante o que vai de ano (sen contar o mes de agosto) con 1.856.948 pasaxeiros, un 13,3% menos que no mesmo período do 2024. Dese total, 1.849.503 voaron en voos comerciais, dos cales 1.513.241 foron a destinos nacionais e 336.262 a destinos internacionais.
En canto ás operacións, houbo 14.830 voos, un 7,1% menos que entre xaneiro e xullo do 2024, dos que 13.474 foron voos comerciais (10.948 a destinos nacionais, e 2.526, a internacionais). A terminal de carga de Santiago rexistrou un total de 2.171,8 toneladas de mercancías nos sete primeiros meses do 2025.
Só no mes de xullo, o aeroporto da capital galega recibiu a 340.346 pasaxeiros, un 12,4% menos que no mesmo mes do ano pasado, e operou 2.534 voos, un 9,7% menos. A terminal de carga moveu 314,5 toneladas.
Polo aeroporto de Peinador pasaron ata xullo 626.499 pasaxeiros, un 10,3% máis que no 2024. Se se ten en conta só o mes de xullo, con todo, o número de viaxeiros en Vigo caeu un 6,5%, ata situarse en 104.160, dos que 99.181 foron en voos nacionais e 4.869 en internacionais.
Durante o mes de xullo operaron 1.149 voos na pista de Vigo, un 3,7% máis, dos cales 867 foron voos comerciais (789 nacionais e 78 internacionais), e a terminal de carga moveu 20,5 toneladas de mercancías.
Polo aeroporto de Alvedro pasaron 744.356 pasaxeiros durante os primeiros sete meses do ano, un 4,3% máis respecto ao mesmo período do 2024, mentres que as operacións aumentaron un 12%, ata os 9.495 voos.
En xullo, a infraestrutura contabilizou 113.126 pasaxeiros, un 0,3% máis que no mesmo mes do 2024, con 113.021 viaxeiros de voos comerciais (101.817 en traxectos nacionais e 11.204 en internacionais). Ese mes operaron na Coruña 1.546 voos, un 7,1% máis, dos que 885 foron operacións comerciais; deles, 751 a destinos nacionais, e 134, a internacionais.