O presidente da Xunta interveu en galego como portavoz da delegación española ante o Comité das Rexións
02 jul 2025 . Actualizado á 22:32 h.O presidente da Xunta, Alfonso Rueda, puxo en valor este mércores en Bruxelas a gobernanza descentralizada, a cohesión e a cooperación transfronteiriza na Unión Europea. «Ninguén ten máis coñecemento do territorio que as rexións, sería un tremendo erro que volvésemos a unha centralización de fondos», expuxo o dirixente galego, que participou na capital comunitaria como portavoz da delegación española ante o Comité das Rexións. Roda interveu en galego no pleno celebrado no Parlamento Europeo con motivo da declaración conmemorativa do 40 aniversario da firma da adhesión de España e Portugal ás Comunidades Europeas.
O titular da Xunta celebrou este fito lembrando que «agora que a turbulencia internacional ameaza con sacudir o noso territorio común, é necesario insistir nas fórmulas de éxito que fixeron da UE o que é hoxe: descentralización, cohesión e cooperación transfronteiriza, da que Galicia e o norte de Portugal son referentes en Europa».
O presidente da Xunta reuniuse, xunto a outros doce representantes rexionais, co vicepresidente de Cohesión e Reformas da Unión Europea, Raffaele Fitto. Durante o encontro, reclamaron que o próximo presuposto plurianual 2028-2034 dedique fondos propios á cohesión e conte coas rexións para distribuílos. Os 13 dirixentes resaltaron nun documento conxunto a relevancia de contar con «un presuposto separado e robusto e unha metodoloxía de asignación baseada nas rexións».
Roda defendeu que todas as comunidades en España apostan por unha xestión descentralizada dos fondos de cohesión europeos «como parte da gobernanza multinivel», e por un modelo máis sinxelo e flexible que garanta que as prioridades da cidadanía inflúan nas decisións comunitarias.
Nesta mesma sesión plenaria, Rueda participou no debate sobre o financiamento para a transición cara a enerxías limpas, onde defendeu o papel estratéxico que pode desempeñar Galicia: «Rexións como Galicia poden ser actores clave nesta evolución cara a neutralidade climática e a autonomía estratéxica. No 2024, Galicia xa superou os obxectivos europeos fixados para o 2030 cun 85 % de xeración eléctrica renovable». Unha cifra que xa supera os obxectivos fixados pola UE para o 2030.
Ademais, Rueda reclamou «superar o impasse legal no que se encontra actualmente o sector en Galicia», sobre o que o Tribunal de Xustiza da Unión Europea pronunciarase dentro dun mes, para poder seguir avanzando. Durante a súa intervención tamén destacou os avances regulatorios que xa pon en marcha a Xunta, como a reserva do 50% da produción de novos parques eólicos para contratos a longo prazo destinados á industria. Tamén destacou o fomento da repotenciación destas instalacións para producir máis enerxía con menos aeroxeradores e a colaboración público-privada para que os beneficios repercutan nas comunidades onde se implantan as enerxías renovables.
Concluíu Rueda a súa intervención na capital comunitaria lembrando o papel das rexións na transición enerxética e esixiu, en consecuencia, «financiación nun proceso de toma de decisións no que debemos estar presentes».