Sanidade empeza o luns para vacinar contra o virus de papiloma humano a homes de ata 21 anos
GALICIA
Con esta medida, anunciada xa por Alfonso Rueda en novembro, quérese inmunizar a 24.500 galegos nados no 2004 e o 2005
20 may 2025 . Actualizado á 12:59 h.O conselleiro de Sanidade, Antonio Gómez Caamaño, anunciou esta mañá no Parlamento galego que a vacina do virus de papiloma humano (VPH) estenderase desde este mesmo luns aos homes de 21 anos, ampliación que xa avanzou o presidente Alfonso Rueda o pasado mes de novembro. Con esta medida aspírase a inmunizar a 24.500 galegos nados no 2004 e o 2005. Ata o de agora o límite atopábase nos 18 anos.
En novembro do 2024, Sanidade activou unha nova estratexia de vacinación para que todos os galegos ata os 18 anos estivesen protexidos contra esta enfermidade, asociada coa aparición de distintos tipos de cancro. A campaña ía dirixida a 27.000 mozos, nacidos entre o 2006 e o 2009, é dicir, entre os 15 e os 18 anos. O conselleiro sostivo este martes no Parlamento galego que Galicia pode presumir de ter un das calendarios de vacinación mellores do mundo.
O proceso de implantación da vacina en Galicia foi gradual. Comezou no 2008 e administrouse ás nenas de 12 anos. Máis tarde a cobertura ampliouse ata a maioría de idade. Segundo os datos de Sanidade, a porcentaxe de adherencia nas nadas entre o 2006 e o 2010, ata os 18 anos, está hoxe próximo ao 100%. No 2022 ampliouse a inmunización aos homes ata os 12 anos, nacidos no 2010. A cobertura entre eles rolda na actualidade o 93%.
Para a próxima campaña da gripe, o conselleiro de Sanidade detallou que a vacinación se ampliará ata os 11 anos e que se administrará ata esa idade a vacina intranasal, co fin de evitar a picada. A Administración galega porá en marcha un proxecto piloto para pór a vacina en centros educativos, que beneficiará a 19.200 escolares de educación infantil (3 a 5 anos) e primaria (6 a 11 anos), que se corresponde cos nados entre o 2014 e o 2022. A vacina de alta carga contra a gripe, que se estaba administrando ata os 80 anos, administrarase tamén entre os 70 e os 79, tal e como anunciou o conselleiro na súa comparecencia, a petición propia.
A deputada nacionalista Montse Prado acusou ao conselleiro de comparecer para eludir o debate sobre os grandes problemas que ten a sanidade, como a falta de pediatras, as listas de espera ou o déficit do servizo público en atención á saúde mental, como recentemente denunciou o Consello de Contas. «Parabéns, xa ten o seu titular coas vacunas, póñase a medalla, pero o resto dos problemas dos galegos que?», denunciou a deputada do BNG.
Elena Espinosa, que recoñeceu o bo traballo do Sergas en materia de vacinación, reprochou ao titular de Sanidade que eluda falar dos problemas máis perentorios, como a falta de recursos. «Está desoriantado sobre as necesidades reais da sanidade galega: a xente está preocupada porque non ten cita», dixo a viceportavoz parlamentaria do PSdeG.
Únete á nosa canle de WhatsApp
Broma final do conselleiro
Ao final da súa comparecencia, visiblemente molesto polo ton empregado pola deputada do BNG (que incluso lle acusou de retorcer as conclusións do informe de Contas sobre saúde mental), Antonio Gómez Caamaño sorprendeu a todos cando lle preguntou a Montse Prado se lle gustaba o fútbol e se se acordaba de Louis Van Gaal, adestrador holandés do FC Barcelona a finais dos noventa. A nacionalista quedou estupefacta e entón o conselleiro, imitando incluso o acento estranxeiro, lembrou a soada frase. «Simpre negatifo, nunca positifo», díxolle o conselleiro, que rematou bautizando á organización frontista como o «Bloque Nacionalista Van Galego».