Non circularán 28 das 83 conexións programadas durante todo o día. Os viaxeiros entre Vigo e Santiago perderán ata seis servizos, como os de Ferrol e A Coruña
14 mar 2025 . Actualizado á 13:12 h.Este luns, 17 de marzo, será a primeira das sete xornadas de folga convocadas polos comités de empresa de Renfe e do ADIF en todo o país contra a forma na que se están traspasando as competencias de Rodalies (proximidades) á Generalitat de Cataluña. Será un paro de 24 horas, de 0.00 a 23:59 horas, que en Galicia afectará a 28 trens dos 83 programados para todo o día.
O Ministerio de Transportes e Movilidad Sostenible impuxo uns servizos mínimos de ata o 72% das circulacións de alta velocidade e o 65% en media distancia, a modalidade máis utilizada en Galicia. En mercancías, só sairán o 24% das circulacións durante o día.
A primeira conexión afectada será a que une A Coruña-Ourense ás 5.50 horas, e tampouco partirá a conexión Ourense-A Coruña das 6.40 horas. Os servizos que unen Vigo Guixar-Santiago das 6.50 horas, 17.10 horas e 18.15 horas non circularán, nin os de Santiago-Vigo Guixar das 15.11 horas, 20.30 horas e 22.10 horas.
Tampouco os de Ferrol-A Coruña das 8.40 horas, 14.40 horas e 17.41 horas. A viaxe inversa, A Coruña-Ferrol, estará afectado ás 12.05 horas, 15.04 horas e 18.32 horas.
Os viaxeiros entre O Carballiño-Ourense que agardasen coller a conexión das 7.50 horas e 15.00 horas non poderán facelo, nin os de Ourense-O Carballiño das 14.30 horas e 21.13 horas. Tampouco funcionarán os servizos entre Monforte-A Coruña das 7.50 horas nin a volta A Coruña-Monforte das 19.35 horas.
Non circularán os trens Vigo Urzaiz-A Coruña das 13.40 horas e 18.15 horas; nin os da Coruña-Vigo Urzaiz das 12.06 horas.
Os trens entre Vilagarcía-Santiago das 12.00 horas e das 20.35 horas non circularán, así como a viaxe inversa Santiago-Vilagarcía das 11.00 horas e das 19.10 horas.
Os servizos entre A Coruña e Santiago só se verán afectados a última hora, ás 22.10 horas dirección Santiago e ás 23.10 horas cara a Coruña.
Ao 17 de marzo seguiranlle outros dous días de paros completos, o 26 de marzo e o 1 de abril, mentres que os días 19, 24, e 28 de marzo, así como o 3 de abril, as interrupcións da actividade serán parciais ao longo de tres quendas.
En concreto, o día 19 parará desde as 6.00 horas ata as 9.00, de 14.00 a 17.00 e de 21.00 a 23.00; o 24 de marzo e 3 de abril de 6.30 a 09.30, de 14.30 a 17.30 e de 20.30 a 22.30; mentres que o 28 de marzo será de 06.00 a 09.00, de 13.30 a 16.30 e de 20.30 a 23.30 horas.
Os motivos polos que se convocou a folga están no acordo político entre PSOE e ERC que expón crear unha nova empresa que opere Rodalies, o que suporá unha duplicidade de custos para as arcas públicas, así como a saída dos traballadores do grupo Renfe. Os sindicatos non se opoñen ao traspaso pero si a que se desintegre Renfe e á duplicidade de custos.