MiChollo, imperio das gangas desde Neda: «Ao ano temos máis de 25 millóns de visitas»
NEDA
O ferrolán Alberto Cinza impulsa este comparador de prezos con éxitos que se volveron virais
11 ene 2024 . Actualizado á 10:36 h.O imperio das gangas móvese desde Ferrolterra, a través da plataforma dixital MiChollo. Funciona como comparador de prezos ou rastrexador, con app propia, con éxitos que se volveron virais. E como mostra do impacto desta empresa fundada polo ferrolán Alberto Cinza (nado en 1982), basta con ver ocorrer no pasado verán. «Chegamos a vender máis de 100.000 latas de refrescos e cervexas (en packs de 12 latas por tres euros, por exemplo) nunha semana a través dunha oferta que sacamos entre Miravia e a nosa propia tenda», indica este empresario e informático.
Máis cifras da repercusión deste buscador e comparador de prezos: «O ano pasado logramos 25 millóns de visitas totais, temos moita competencia pero non nos estancamos». Como funciona a plataforma con base en Neda? «Filtramos cada día as mellores ofertas ou choios, a través das principais ecommerce e marketplace, os nosos usuarios entra na web ou a aplicación e atópanas», indica Cinza.
A través das vendas logradas directa ou indirectamente en Michollo.com de plataformas como Amazon, Aliexpress, Miravia ou El Corte Inglés, esta empresa de Ferrolterra recibe unha comisión nun modelo de afiliación. A maiores, «temos a nosa tenda en liña de choios propios con grupos de vendedores que usan Amazon ou Aliexpress, entre outros, é o noso escaparate con choios creados aquí mesmo en prezos moi bos... e é o noso valor engadido». De aí o puntazo o pasado verán do lanzamento de packs de refrescos e cervexas (de marcas moi coñecidas) entre a súa tenda e Miravia, «cando tivemos 7.000 pedidos e houbo que contratar a 20 persoas».
MiChollo tamén logra impactos a través de redes sociais como os seus vídeos en TikTok. Naceu en outubro de 2015, «empezamos con listas de difusión en Telegram e WhatsApp, iniciamos a publicación de choios e foi o principio do éxito». Actualmente, Alberto Cinza conta como empresario con 14 traballadores sen contar os freelance. E a maioría operan en remoto, «xa antes da pandemia fomos pioneiros en traballar desde casa».
Descontos de ata o 80%
En MiChollo ofrécense gangas en sectores como a tecnoloxía («o noso número un en vendas»), alimentación, xoguetes, moda («cun tirón moi forte agora nas rebaixas») ou o fogar (téxtil, enxoval). Indica que se se suman «choios, rebaixas e cupóns exclusivos de cada tenda podemos chegar ata un 80% de desconto a través de tres baixadas de prezos». E admite que «agora está a tirar moi forte a venda de aceite, é moi buscado».
Outro éxito foi cando fai un par de anos sacaron un Satisfyer «a moi bo prezo, foi unha tolemia». Alberto Cinza traballou anteriormente como administrador de sistemas informáticos, en Inditex ou o Sergas, entre outros. «Coa miña propia empresa non paro de traballar porque hai que buscar choios todos os días», indica este emprendedor, galardoado en 2022 como mellor Novo Empresario de Galicia pola asociación AJE.