San Sadurniño e As Somozas, libres da couza das patacas, que aínda condiciona as plantacións en Fene, Cariño, Cedeira, Mugardos e Moeche
MOECHE
As únicas zonas inzadas son as parroquias da Pedra, en Cariño; Barallobre e Maniños, en Fene
04 feb 2025 . Actualizado á 05:00 h.Os municipios das Somozas e San Sadurniño quedaron libres da couza guatemalteca, segundo a última resolución da Consellería do Medio Rural, que actualiza as zonas afectadas pola Tecia solanivora Povolny. As parroquias de Santiago (As Somozas); e Lamas e Ferreira (San Sadurniño) xa poden plantar con liberdade. O mesmo ocorre con tres parroquias de Moeche —Labacengos, San Xoán e Santa Cruz—, mentres que San Xurxo pasa de ser considerada como área inzada á cualificación de zona tampón, polo que se pode plantar con requisitos.
Continúan sendo áreas inzadas as parroquias da Pedra, en Cariño; Barallobre e Maniños, no concello de Fene. E mantéñense como zona tampón, por ser limítrofes con puntos inzados, as parroquias de Landoi, Sismundi e Cariño, neste último concello; Régoa (Cedeira); Limodre, Magalofes e Perlío (Fene); e Franza e Piñeiro (Mugardos).
Nas zonas inzadas prohíbese a plantación deste tipo de tubérculos, mentres que nas áreas tampón si se autoriza, pero coa obrigación de realizar unha comunicación de todas as parcelas cultivadas inmediatamente despois de seméntaa, «e en todo caso antes do 1 de abril», como indican desde Medio Rural. Poderá presentarse na oficina rural máis próxima, en calquera rexistro ou a través da sede electrónica da Xunta de Galicia (https://sede.xunta.gal/portada).