O mercado inmobiliario reactívase en Ferrolterra: «Pequenos aforradores que teñen 40.000 ou 50.000 euros compran para alugar»
FERROL CIDADE
A vivenda de segunda man é a que mantén ao sector, sen apenas obra nova á vista e parón total na venda de soares
28 ene 2024 . Actualizado ás 04:29 h.O cambio de ano parece ter suposto certo revulsivo para o mercado inmobiliario, que estaba algo adormentado na comarca, como recoñecen as axencias consultadas, sobre todo polo encarecemento do financiamento. «O ano empeza animado», en opinión de Laura García, responsable de Cisbar na provincia, que debulla varias razóns para confiar nun bo 2024 para o sector: «A baixada do Imposto de Transmisións Patrimoniais [ITP] do 9 ao 8 %; os tipos de interese, que parece que van baixar e vanse a animar os préstamos hipotecarios; ou o feito de que despois dun ano de inestabilidade política teñamos empezado este con un Goberno».
García engade que «segue aumentando a demanda de compradores foráneos, tanto de fóra de Galicia (a maioría) como de fóra de España». E sinala outro aspecto a ter en conta: «O stock actual de vivendas en mans de fondos é residual (sete en Ares , unha en Cedeira , unha en Valdoviño ...)». «É certo que estamos pendentes da entrada de promocións enteiras que están á espera de licenzas ou traballos de acondicionamento —apunta—. Unha vez que saian están practicamente garantidas as vendas pola ampla lista de espera de interesados que hai».
A representante de Cisbar alude a «grandes operacións» formalizadas en 2023, como a do edificio Mazote, en Ares, un complexo de 46 vivendas herdado da Gran Recesión. «Que se pechou a venda nos últimos meses é significativo da demanda na zona», sostén. Jennifer Servia, responsable da axencia Housefulness, na Estrada de Catabois, apenas notou parón o ano pasado: «Non tiven negativas de hipotecas. É verdade que os meus clientes, antes de ensinarlles unha vivenda, van ao banco e se non danlles o diñeiro xa non seguimos adiante. Ou poden comprar porque teñen o diñeiro ou son operacións financiables».
A tranquilidade do rural
Servia escapa de óbralas pantasma». Opera con vivenda usada, que acaba en mans de «xente que vendeu e quere reinvestir» ou de estranxeiros «que queren vir a vivir á zona rural, con vistas ao mar ou non, porque o que buscan todos é tranquilidade, nada de casas encostadas, senón leiras onde poidan cultivar para autoconsumo», detalla. Ferrol, Narón, Valdoviño, Pontedeume, Ortigueira ou Cedeira conforman a súa área de influencia, xunto a San Sadurniño ou Moeche, «cada vez con máis interese porque están preto da cidade e teñen servizos básicos como farmacia ou centro de saúde». A oferta de Housefulness nútrese de casas para restaurar e algunhas «novas, modernas, moi atractivas», oportunidades que aparecen tras «un divorcio ou o falecemento dun dos cónxuxes, porque necesitan saldar algunha débeda ou cancelar a hipoteca».
«Xaneiro está a ser bastante movido», asegura Olga Quintela, unha das socias da inmobiliaria O Ponto, de Narón. Destaca o papel dos pequenos aforradores, «xente que ten 40.000 ou 50.000 euros no banco e compra para alugar; sabe que hai poucos pisos (aínda que sexa un segundo ou un terceiro sen ascensor aparecen inquilinos) e os prezos (de arrendamento) están carísimos. Se non teñen que hipotecarse rendibilízano».
Este tipo de compradores xorden aquí e fóra, indica Quintela: «Hei ir a ensinar un primeiro sen ascensor en Maniños [Fene] por 43.000 euros a xente de fóra que o quere comprar para as vacacións e, se non, alúgao». Hai máis perfís de cliente, desde os coruñeses que prefiren investir en Ferrol porque é máis barato, «e arrendar vano arrendar igual», a quen rastrexa ata dar cun piso «de prezo controlado, de 70.000 a 120.000 euros, para vivir», comenta.
Case todo de segunda man
A vivenda usada copa o mercado. Os prezos dependen da zona, como subliña Marta Saavedra, da inmobiliaria ferrolá Artemisa: «O piso estándar para entrar a vivir vai de 120.000 a 160.000 euros, pero en Caranza atopas por 55.000 ou 60.000». Para reformar, na cidade oscilan entre os 30.000 e os 90.000. A maior demanda, indica, corresponde a «pisos duns 15 anos, para entrar a vivir pintándoos; pisos para rehabilitar totalmente e pisos xa rehabilitados. Ademais das casas no rural». En canto aos inquilinos, quen aluga? «En Ferrol, estudantes, militares, empresas de fóra de España e españolas (vinculadas ao estaleiro), persoal do hospital, estranxeiros de Erasmus e familias», responde Saavedra.
A obra nova «nin está nin lla espera», prognostican as axencias. A responsable de Artemisa coincide con Quintela en que «non se venden solares», a pesar de que «o chan está moi barato», porque os construtores «non se animan a construír», algo que atribúen á subida dos materiais —«a que prezo teñen que pólo para que sexa rendible?», pregúntase Quintela—.
«Estranxeiros con casa no sur de España queren comprar aquí escapando do sol»
Na comarca xa empeza a percibirse un dos efectos da crise climática na mobilidade. A Olga Quintela, da inmobiliaria O Ponto, chámalle a atención a chegada de xente do sur en busca de vivenda: «Son estranxeiros que compraron residencia na Costa do Sol e que agora están saturados e veñen escapando do sol. A calor resúltalles insoportable e miran casas no norte».
Conta que «os que llo poden permitir xa viven todo o ano en España e outros pasan uns meses no seu país e outros aquí, e agora queren seguir facéndoo pero no norte», sen o abafo do termómetro. Trátase dunha tendencia emerxente que podería incidir de forma directa nos prezos da vivenda, polo alto poder adquisitivo do comprador do centro e o norte de Europa.