O capítulo dos presupostos destinados aos novos proxectos inclúe partidas dos fondos Edusi
13 ago 2021 . Actualizado á 15:53 h.A reurbanización da rúa de la Iglesia é a intervención máis custosa dos proxectos incluídos no capítulo de investimentos dos presupostos municipais que o goberno socialista de Ferrol aprobou inicialmente o xoves, co apoio de FeC e BNG. Dun montante global de 22 millóns de euros, a proposta deseñada para esa importante vía do centro da cidade leva 2.400.000 euros, que se executará con cargo a unha operación de crédito de 14,6 millóns. Séguelle en volume de investimento o proxecto de rehabilitación da casa de Carvalho Calero, cifrada en 1.650.000, dos 784.000 corresponde á subvención dos fondos europeos Edusi.
A continuación figura a rehabilitación de vivenda pública no barrio de Recimil, con 1.490.000 euros, dos que 1.192.000 proceden do Edusi; e as obras de humanización do primeiro tramo da estrada de Castela, entre a praza de España e Porta Nova, para as que se destinan 1.453.750 euros, dos que 1.163.000 tamén é subvencionado polos fondos europeos.
Xa por menos dun millón, a listaxe de investimentos proxectados polo Concello continúa coa reurbanización da rúa San Francisco, con 935.000 euros -748.000 do Edusi-; o parque de Fontelonga, con 615.000 euros; a demolición da nave provisional do mercado, con 600.000 euros; e a reurbanización de Manuel Belando/Nova de Caranza, con 577.000 euros; mentres que para continuar coa rehabilitación de espazos no castelo de San Felipe destínanse 539.000 euros.
A primeira fase da ampliación do cemiterio municipal de Catabois ten asignada unha partida de 250.000 euros e a mellora da travesía de Batallóns outra polo mesmo importe.
O alcalde de Ferrol, Ángel Mato, asegurou onte que o presuposto municipal ten como obxectivo reactivar a economía e xerar emprego. E engadiu que se trata dun documento «feito polos grupos representados non concello; por todos sen excepción, porque nel recolléronse incluso propostas do Partido Popular».