A Fiscalía Anticorrupción defende a legalidade do xuízo aos Pujol

A Fiscalía Anticorrupción negou este mércores as supostas irregularidades aducidas pola defensa dos Pujol Ferrusola no xuízo que se segue contra eles na Audiencia Nacional por corrupción. Na terceira xornada da vista oral, o representante do ministerio fiscal, Fernando Bermejo, respondeu as alegacións expostas polos avogados dos 19 procesados nas dúas primeiras xornadas, que piden a nulidade das principais probas incriminatorias. Bermejo desvinculou as cuestións políticas que orbitan sobre o caso, como a suposta operación Cataluña ou a chamada «policía patriótica», dos feitos delituosos que se expoñen no escrito acusatorio. «Pretendeuse converter rumores políticos en causas de nulidade», sinalou o fiscal, que defendeu as actuacións policiais levadas a cabo durante a instrución: «A UDEF (Unidade de Delincuencia Económica e Fiscal da Policía Nacional) actuou sempre baixo o control xudicial, isto exclúe por completo calquera vulneración da Constitución». Tampouco dubidou ao afirmar que a orixe da causa é lícita, ao partir da denuncia de Victoria Álvarez, a exparella do primoxénito, Jordi Pujol Ferrusola, primeiro ante a policía e logo en sede xudicial. O fiscal tamén rebateu a suposta prescrición dos delitos, manifestada polas defensa dos empresarios implicados. «Aquí empézase a branquear case no ano 92, e non para de branquear con movementos bancarios ata inclusive o ano 2011; verémolo no conxunto de contas bancarias que teñen en diferentes países os señores Pujol», concluíu.

Do 3% denunciado por Maragall ao caso Palau, o lado máis escuro do nacionalismo catalán

Xavier Gual

Tras o fiscal, foi a quenda dos representantes da Avogacía do Estado, que deron por boas as informacións xornalísticas de xullo do 2014, que levarían ao expresidente catalán a confesar a existencia unha suposta herdanza do avó Florenci oculta no estranxeiro. «Non hai un pecado orixinal», sinalou José Ignacio Ocio, que exerce a acusación particular en nome do Estado polos delitos contra a facenda pública.

Transcorridas menos de dúas horas de sesión, o presidente do tribunal, José Ricardo de Prada, suspendeu a vista, que se renovará o próximo 10 de decembro.

---

---

---