Así é o buque Galicia, o xigante do mar con helicópteros e hospital a bordo, que chega para axudar aos afectados pola dana
ESPAÑA
Esta embarcación anfibia de 160 metros de eslora xa está no porto de Valencia. Trátase dunha navío que participou en misións como a do furacán Mitch, a limpeza das costas tras a catástrofe do Prestige e converteuse en centro sanitario durante a pandemia do covid. O barco construíuse en Ferrol hai case 30 anos
04 nov 2024 . Actualizado á 15:12 h.O buque Galicia xa está en Valencia. Este xigante do mar chegaba este luns, ás 8.000 horas, ao porto da capital do Turia para axudar á provincia tras o devastador paso da dana que deixa máis de 200 falecidos.
A tripulación deste buque de asalto anfibio (BAA) da Armada, con base en Rota, Cádiz, leva a bordo máis de 300 mariños a bordo. O seu persoal foi formado na Escola Naval de Marín, a escola de Suboficiais de San Fernando ou a escola Antonio Escaño de Ferrol.
Que fai
Esta embarcación, como informa a Armada, foi deseñada para transportar tropas e vehículos e para operar con embarcacións anfibias no seu dique e con helicópteros na súa cuberta de voo. «A misión principal dos buques desta clase é levar a cabo operacións anfibias. As súas misións inclúen tamén operacións de mantemento da paz e de axuda humanitaria, mediante apoio médico e cirúrxico, en catástrofes naturais, xa que conta cun hospital a bordo de grandes prestacións». A instalación sanitaria ten oito camas uci que poden ampliarse «cando faga falta».
En total, máis de 3.500 metros cadrados de superficie de carga incluíndo pañoles, cuberta de voo e hangar.
Como asegurou o alferez de navío José María Cordero a Efe, entre os vehículos enviados destacan sete de transporte pesado, que poden utilizarse para subministración de víveres, entre outras accións, e dous lixeiros, que proporcionan maior rapidez para chegar aos sitios. E é que o Galicia leva a bordo comida, auga e material de apoio nesta emerxencia.
Sobre as misións que van desempeñar os efectivos chegados hoxe, Cordero explicou que o coordinador militar será quen determine as accións máis necesarias. «Se decide que os medios se utilicen para rescatar persoas, serán para iso. Se é para abrir camiños, serán para iso. Para todo o que faga falta», sinalou.
En números
Este buque anfibio despraza 13.000 toneladas, ten 160 metros de eslora e 23 de manga. Dispón dun hangar para catro helicópteros pesados ou seis medios, e pode realizar operacións tanto de día como de noite.
Para cumprir a súa misión en Valencia embarcaron algo máis de 100 infantes de mariña, nove vehículos todo terreo, dous helicópteros SH60F de transporte de persoal con capacidade para voo nocturno, dúas lanchas de desembarco, equipo naval de praia, un médico, dous enfermeiros e un sanitario.
Nesta misión servirá ademais como aloxamento para boa parte dos militares desprazados á provincia. Ademais da a súa tripulación pode acoller a unhas 400 persoas máis.
«Nado» en Ferrol
O buque Galicia empezouse a construír en 1995 na antiga Bazán, agora Navantia, en Ferrol, e foi botado en xullo de 1997 para a súa entrega á Armada en 1998. Leva por tanto máis de 25 anos ao servizo do Exército.
A súa dotación habitual está composta por 185 homes e mulleres. «En total somos 18 oficiais, 28 suboficiais, e 145 cabos primeiros, cabos e mariñeiros», din.
A chegada do Galicia Valencia significa, por tanto, un incremento de algo máis de 300 efectivos que se incorporan aos xa miles de homes e mulleres despregados que loitan contra os efectos das inundacións, sen ter data prevista de regreso a Rota. «Estamos aquí para axudar, viñemos en canto nos chamaron», explicou Cordero.
No Prestige
Na vida operativa deste navío hai que destacar os labores de transporte do persoal e material que participou na KFOR na antiga Iugoslavia, a súa participación nos labores de axuda tras as inundacións causadas polo furacán Mitch en Centroamérica, a limpeza na contaminación causada polo afundimento do Prestige (decembro 2002-xaneiro 2003), a Operación SJ de axuda humanitaria a Iraq ou a Operación Atalanta na loita contra a piratería en augas do Océano Indico e a conca de Somalia en varias ocasións entre o 2010 e o 2017.
En abril do 2020, o Galicia atracou en Melilla para dar apoio sanitario como buque hospital durante a epidemia do covid-19.
Como publicaba unha reportaxe de La Voz no 2023, a fortaleza deste navío está no factor humano. «Os máis de 3.000 homes e mulleres que tiveron o orgullo e a honra de formar parte da súa dotación ao longo destes 25 anos; once misións e 2.429 días de mar», dicía a Armada hai un ano.