Uns 200 axentes da UIP de Vigo e A Coruña súmanse ao despregamento policial en Valencia

Uns 200 axentes da Unidade de Intervención Policial (UIP) destinados na Coruña e Vigo sumaranse ao despregamento en Valencia. Os cinco grupos galegos engadiranse a compañeiros doutras doce unidades procedentes, entre outros lugares, de Zaragoza, Barcelona, Madrid, Valladolid e Oviedo. Os da Coruña tiñan previsto saír esta tarde, pero uns 80 de Vigo non poderán facelo ata mañá, pois lles comunicaron que deben permanecer na cidade porque esta noite hai partido do Celta. «É unha aberración, unha vergoña que sexa máis importante o fútbol que axudar en Valencia», denuncian desde a Confederación Española de Policía. O sindicato reclama ademais, como xa fixo noutras ocasións, que os clubs «paguen os gastos de seguridade dunha actividade económica privada e non todos os españois».

A misión dos axentes en Valencia será de «seguridade integral», desde manter a seguridade á orde pública. Así, o labor dos antidisturbios consistirá en desaloxar vías para que a xente non estorbe á maquinaria que traballa retirando entullos e evitar que sexa atropelada, así como impedir «os saqueos que se están dando a xoierías e comercios, porque hai salvaxes que se queren beneficiar dos damnificados», explica Javier Martínez, da Confederación Española de Policía. Engade que tamén traballarán para que non se produzan enganos como o que leva a cabo falso persoal da Cruz Vermella pedindo diñeiro.

Sen almorzo

O citado sindicato denuncia que os axentes «pon diñeiro do seu peto porque a dieta, que non se actualiza desde hai dúas décadas, non lles cobre os gastos». Explica Martínez que lles dan 60 euros (o 80% da dieta que é de 72) ao día para durmir, comer e cear. «O almorzo non está incluído e, como dicimos nós, ata un preso ten máis de dúas comidas ao día».

---

---