Aragonès obvia a Puigdemont e sinala a Illa como o seu único rival
ESPAÑA
Ábrese a pactar outra vez con Junts e a acordos cos comúns e a CUP
14 mares 2024 . Actualizado ás 21:56 h.De único apoio nos orzamentos a único rival nas eleccións catalás. E todo, en 24 horas. O PSC foi o único partido que apoiou os Orzamentos de Pere Aragonès e, este xoves, é visto por Esquerra Republicana como o seu principal adversario nas eleccións autonómicas do 12 de maio. Junts, en cambio, é para ERC un eventual aliado.
O republicano ve «incompatible» o seu modelo co do PSC porque choca co obxectivo de «avanzar cara á independencia de Cataluña». Marta Villalta, portavoz dos republicanos, foi aínda máis clara: «Estas eleccións van de dous candidatos». Tamén dixo que o PSC é «do século pasado».
Aragonès marca terreo con Salvador Illa, que este sábado será referendado como candidato polo seu partido, e tende a man a Junts ao ver plausible unha reedición dun Goberno de coalición que apenas durou un ano e medio. «Oxalá fose posible, pero esta proposta non a hei de responder eu porque os que saíron do Goberno foron eles», asegurou en RAC1 o presidente catalán, proclive a «puntos de entendemento» con Junts, a CUP e os comúns, a pesar de que, a xuízo dos republicanos, a súa negativa aos Orzamentos propiciou o adianto electoral.
Aragonès atribúe o bloqueo dos comúns a «intereses partidistas». A formación de Ada Colau negou os orzamentos polo proxecto dun macrocasino en Tarragona. Aragonès tamén dixo que Yolanda Díaz non puxo da súa parte para desbloquear a situación. «Se fose Sánchez, estaría un pouco enfadado», asegurou.
Salvador Illa, pola súa banda, recolleu a luva de Aragonès. Asegurou en Onda Cero que, durante esta lexislatura, viuno «máis un candidato que un presidente». O exministro de Sanidade afronta a precampaña con dous factores craves neste contexto: o dano que o caso Koldo poida causarlle tanto ao PSOE como a el mesmo e a reacción do seu potencial electorado á lei de amnistía. Illa instou os electores a apostar por un «goberno sólido». Ademais, mandou un recado a Puigdemont: «Hai que pasar páxina e abrir un tempo novo. Hai persoas que o que representan é o pasado, un pasado que non foi bo para Cataluña». O primeiro secretario do PSC asegurou que o argumento do macrocasino é simplemente «unha escusa» dos comúns, aos que acusou de pensar máis en eleccións que en Cataluña.
Puigdemont, candidato
Carles Puigdemont aspira a ser o cabeza de lista de Junts nestas eleccións. No 2021 foino de forma simbólica pola súa condición de fuxido da xustiza. Para que sexa real, o eurodeputado depende dos trámites da lei de amnistía ,que estará polo menos dous meses no Senado, e o devir da euroorden que pesa sobre el. Os posconvergentes non teñen garantías de que Puigdemont poida volver a España con garantías para unha eventual sesión de investidura, que aproximadamente tería lugar a finais de xuño.
Xa que logo, e máis tras a inhabilitación da presidenta de Junts, Laura Borràs —candidata a efectos prácticos no 2021— por delitos de falsidade en documento oficial e prevaricación, Junts anunciou onte a convocatoria de primarias para o 23 de marzo. As listas electorais elaboraranse do 3 ao 5 de abril.