Catorce postos están reservados a técnicos superiores, e o resto, para persoal de oficina, nunha oferta de emprego que se lanzará o venres
15 may 2025 . Actualizado á 00:21 h.Navantia abrirá o venres, día 16, a convocatoria de 31 novas prazas para o estaleiro de Ferrol. Esta oferta prodúcese despois de que a representación social do persoal mantivese distintas reunións coa dirección para acordar os perfís destes primeiros postos que pretende incorporar á factoría. Das 31 novas prazas, 14 están reservadas a técnicos superiores (10 para júnior, é dicir, con menos de catro anos de experiencia no posto). Os outros 17 empregos están destinados a persoal de oficina.
Navantia anunciara o pasado mes de febreiro a súa intención de convocar 97 prazas para o estaleiro ferrolán e estas 31 son as primeiras desta cota. O presidente da compaña pública, Ricardo Domínguez, non deixou de expresar nas últimas semanas a súa preocupación polas dificultades para atopar persoal para os seus centros de traballo, principalmente nesta etapa expansionista de contratos e con importantes programas que se materializarán no marco do plan de rearmamento.
Por especialidades, en canto ao persoal de oficina convócanse 9 prazas para técnicos de Tecnoloxías da Información júnior; seis para técnicos sénior de Ciberseguridade e Infraestruturas TIC; un para técnico sénior de Sistemas para Enxeñería e outra para técnico sénior en Redes Industriais.
No grupo dos técnicos superiores ofértase unha praza para cada un destas especialidades: Asesoría Xurídica (júnior); Presupostos; Talento e Diversidade (júnior); Medio Ambiente (júnior); Contas a Pagar (júnior); Sistemas SAP Produción; Sistemas de Enxeñería (júnior); Data Architecture Management (júnior); Análise de Datos, e Ciberseguridade. Ademais, a empresa oferta dúas prazas para TI SAP (júnior) e Deseño para Fabricación (júnior).