Axusta o persoal mentres de adapta a fábrica á nova plataforma de produción de coches eléctricos
12 feb 2024 . Actualizado á 19:47 h.A dirección de Ford e UXT, o sindicato maioritario na fábrica de Almusafes (Valencia), acordaron un novo expediente de regulación temporal de emprego (ERTE) que afectará a un máximo de 500 traballadores ao día e que estará activo desde este martes ata o 28 de marzo para adaptarse ás baixadas de produción na factoría. Ningún empregado poderá estar máis de 16 días laborables de suspensión.
As condicións económicas deste expediente serán as mesmas que nos ERTE anteriores: a empresa garante o 80% do salario real e o 100% de pagas extras, gratificación especial, vacacións, e antigüidade.
O acordo non foi subscribido por STM-Intersindical, que anunciou que non apoiará «máis perdas salariais», xa que «o persoal volve perder un 20% do seu salario diario real». Este sindicado criticou «a penosa situación» á que, ao seu xuízo, «arrastrou» ao persoal o acordo de electrificación. «Xa estamos a sufrir unha diminución económica de preto de un 10% do poder adquisitivo. Perdemos demasiado», lamentou.
A fábrica valenciana foi elixida hai dous anos por Ford para instalar a súa nova plataforma de vehículos eléctricos a partir do 2025, unha decisión que aseguraba a carga de traballo nos próximos anos pero que non evitou que se tivese que redimensionar o persoal, cun ERE que afectou a 1.124 traballadores. Mentres non se inician os investimentos, que van con atraso, a fábrica tivo que axustar a súa produción ante a redución de vendas.