Só A Estrada avanzou xa as súas contas para o próximo ano, se ben aínda están sen aprobar
30 nov 2025 . Actualizado á 05:00 h.A elaboración dos presupostos debe figurar no primeiro posto da lista de tarefas que teñen os gobernos locais. As contas convértense na ferramenta imprescindible para a xestión dos concellos. Pero con farta frecuencia a súa elaboración e posterior aprobación en pleno atáscase por múltiples motivos. E que entren en vigor os de cada ano a día 1 de xaneiro convértense nunha verdadeira utopía. Para o 2026 volverá ocorrer en Deza e Tabeirós-Terra de montes. A un mes de finalizar o 2025 tan só A Estrada avanzou xa as súas contas, iso si, aínda sen aprobarse pola corporación e por tanto sen activarse o proceso de exposición ao público, resolución de posibles alegacións e referendo definitivo, polo que non estarán operativas coa estrea do novo exercicio.
Como comentamos A Estrada lidera nas comarcas a planificación do seu presuposto para o 2026. Foi o pasado 18 de novembro cando presentaba en público as cifras, cun crecemento do 8,6% respecto a este ano, para chegar aos 19,4 millóns de euros. Destacan dúas cuestións. Por unha banda, amplíase de 400.000 a un millón de euros a partida de investimentos. Por outro, o goberno local do PP decidiu non incluír os fondos europeos do EDIL, de máis de catro millóns de euros, co argumento de non tensionar a estabilidade orzamentaria.
Precisamente o atraso en coñecerse as partidas do EDIL así como doutras achegas do Estado motivan que o Concello de Lalín, que habitualmente figura entre os que cumpren os deberes ou achéganse bastante para que entre en vigor o presuposto co inicio do ano, aínda se atope ultimando os detalles das súas contas para o 2026. No seu caso especialmente polos fondos europeos, xa que tiveron que reaxustar proxectos a executar ao reducirse a contía agardada. De todos os xeitos no seo do goberno local do PP confían en que poidan aprobarse as contas ao longo de decembro, incluso antes do previsto pola tardanza de coñecer esas partidas que Lalín si quixo incluír nas súas contas, ao contrario que A Estrada. O Concello lalinense xestiona este ano un total de 21,6 millóns de euros.
Pola súa banda, en Silleda o goberno socialista en minoría tampouco ten aínda as contas para o próximo exercicio. Fontes municipais apuntan que están a traballar na súa confección se ben aínda sen data para levalos a aprobación plenaria. Seguro que terán dificultades para iso sen un consenso de mínimos previo con BNG ou PP, partidos que están a facer pinza en distintas ocasións, a última pedindo unha rebaixa do IBI a través dunha moción aprobada en pleno. Neste 2025 a piques de finalizar o Concello trasdezano xestiona unhas contas de 8,6 millóns de euros.
Tampouco Vila de Cruzamentos dispón aínda de contas para o 2026. O goberno local en minoría de Xuntos polo noso Concello está a traballar co obxectivo de presentalas a principios do próximo ano, probablemente en xaneiro pero con dúbidas. Antes tocaralles testar se contan polo menos con algunha abstención ou apoio entre as tres forzas da oposición para sacar adiante o presuposto do próximo exercicio.
Cambio en Agolada
Un caso especial atopámolo en Agolada, tras a recente dimisión de Luis Calvo á alcaldía, unha vez que decidía non recorrer a sentenza do TSXG que lle inhabilita para cargo público durante nove anos de inhabilitación por un delito de prevaricación administrativa. Quedou como rexedor en funcións Óscar Val, a quen lle tocará xunto ao resto de compañeiros da Partido Anticorrupción e Xustiza (PAYJ) elaborar as contas municipais para o próximo ano. As do 2025, por un importe de 3,6 millóns de euros, aprobáranse a mediados de decembro do 2024. Pero o pasado xullo tívose que aprobar en pleno un plan económico-financeiro ao incumprir a regra de gasto e a estabilidade orzamentaria.
Pola súa banda, en Rodeiro seguen aínda co presuposto do 2017 en vigor e parece difícil que haxa un novo para o 2026. Máxime tras aprobarse hai poucos días unha actualización desas vellas contas que un presuposto do 2025 por parte da coalición de goberno de PSOE-UxR, cando ademais está a acabar xa o ano.
En Dozón o goberno do PP está a ultimar a súa elaboración para levar as contas a pleno en decembro, mentres en Forcarei aprobaran en agosto o deste ano, de 2,54 millóns e que entrou en vigor en outubro, tras o cambio de goberno que devolvía a alcaldía aos populares.