Crespo abordou cunha representación de hostaleiros os incidentes das últimas semanas en Lalín
DEZA
O alcalde de Lalín, José Crespo, recibiu a unha representación de hostaleiros da localidade que lle solicitara un encontro no que poder abordar os incidentes e pelexas que se produciron nas últimas semanas e que chegaron a rexistrar a denuncia dun hostaleiro ante a Garda Civil que manifestou que foi agredido.
No encontro estiveron presentes, ademais do rexedor e os hostaleiros, o concelleiro de Seguridade Cidadá, Pablo Areán, e o oficial xefe da Policía Local, Pablo Pérez Asorey. Despois desta primeira toma de contacto no que os hostaleiros falaron cos representantes municipais desas situacións que están a xerar sensación de inseguridade. Uns incidentes vinculados principalmente aos horarios do lecer nocturno e que se veñen producindo, sobre todo, as fins de semana.
Tras a reunión, Pablo Areán, anunciou que está previsto que a próxima semana celébrese un novo encontro a fin de coñecer e recoller, xa de forma pormenorizada, as opinións e pareceres de cada un dos hostaleiros respecto a estas incidencias e a esta situación. As conclusións que se recollan nesta, analizaranse e trasladaranse, apuntan, a outra posterior reunión á que serán convocados tamén representantes da Garda Civil e Policía Local. Nela estarán tamén os representantes municipais e preténdese que sirva para adoptar medidas e decidir se se convoca a Xunta Local de Seguridade.