Carmelina Bellas e Shirley Fernández remataron cuartas na clasificación feminina do Eco Rali de Fafe
04 nov 2025 . Actualizado á 19:35 h.Os tramos do World Rally Car en Fafe foron testemuñas do enorme desempeño dunha nai e filla de Viveiro. O Bellas & Cubi Competición, esta vez representado por Carmelina Bellas ao volante e Shirley Fernández á súa dereita, competiu na última proba do Campionato Portugués de Novas Enerxías 2025, onde finalizou no vixésimo lugar da xeral e o cuarto da clasificación feminina.
«Foi un rali rápido e tivemos que adaptarnos sobre a marcha. A inexperiencia nótase, pero aos poucos iremos gañando ritmo e mellorando os nosos resultados», destacou Shirley tras a súa segunda experiencia como copiloto nunha competición de regularidade e eficiencia que esixiu medias de velocidade moi altas, fieis ao espírito da considerada catedral internacional dos ralis.
«Adaptarnos sobre a marcha»
As viveirenses enfrontáronse a unha complexísima competición en Fafe, con tramos hectométricos e CHSP —de control de paso sen parada—. «Tocounos adaptarnos sobre a marcha, especialmente aos CHSP. Esta competición non se parece en nada ao que adoitamos facer na FIA Bridgestone EcoRally Cup e iso separounos un pouco dos pilotos locais, que teñen máis experiencia nestas condicións», razoou a copiloto mariñá.
«Démolo todo e no segundo día xa notamos a mellora», reflexionou tras dez tramos e máis de 180 quilómetros a bordo dun Hyundai Kona nun Eco Rali de Fafe que finalmente situou a Carmelina Bellas e Shirley Fernández no top 20 e preto do podio de mulleres. «Carrera a carreira, iremos a mellor», destacaron satisfeitas coa súa evolución nunha complicada e rápida carreira.