O público xeral pagará 35 euros por presenciar o partido do xoves 30 ás 19 horas nO Pardo, en Navia
13 oct 2025 . Actualizado á 19:56 h.O Porto de Vega CF xa ultima detalles para a cita máis importante, ou polo menos a que maior repercusión acadou, da súa historia. O conxunto asturiano xa puxo á venda as entradas para o partido da Copa do Rey que lles enfrontará ao Celta, equipo de Primeira División que actualmente tamén compite na Europa League, o xoves 30 a partir das 19 horas nO Pardo, en Navia.
Descartado o seu estadio habitual, O Campón, por non cumprir os requisitos mínimos que esixe a RFEF para albergar o encontro, o Porto de Vega traballa na instalación de bancadas supletorias para acadar unha capacidade de ata 4.000 espectadores. Son unhas cantas as penas celtistas, algunhas delas radicadas na Mariña, que xa se interesaron pola compra de entradas desde o mesmo día do sorteo.
Cada pase custará 35 euros e pode comprarse xa nunha web habilitada polo club anfitrión e desde este martes fisicamente no Quiosco de Porto de Vega, en horario de 16.30 a 20.
Actualmente competindo en Primeira Asturfútbol, a sexta categoría do balompé, o equipo naviego conseguiu o billete copeiro ao superar con claridade ao Alberite nunha eliminatoria previa. Os homes de Javi Prendes cítanse agora cos de Claudio Giráldez.