Adrián González, remeiro do Club de Remo Puebla: «Hai uns poucos anos era dos máis novos e xa son dos máis veteranos»
DEPORTES
O equipo barbancés espera ondear a súa primeira bandeira deste Liga B na regata que o sábado terá lugar na Pobra
11 jul 2025 . Actualizado á 10:27 h.O Club de Remo Puebla é este ano como a ave Fénix. Rexurde das súas cinzas tras o incendio que calcinou a súa sede a noite do 5 de xaneiro e o fai, en canto á traiñeira, cun proxecto esperanzador e de futuro, como apunta o remeiro Adrián González. El comezou a participar na Liga Galega de Traiñeiras no 2011. «Fai uns poucos anos era dos máis novos e xa son dos máis veteranos», apunta para dar fe da renovación do equipo.
«Temos un proxecto verde, como a cor do noso club, e que xera ilusión. Pensado para que o futuro poida ser moi bo. Iso si, hai que ir paso a paso, non se pode correr», afirma un González que tamén forma parte da directiva da entidade.
Fotógrafo, mariscador e remeiro, o pobrense é autónomo e este ano incluso cubriu como cámara para a televisión o conflito entre Israel e Palestina sobre o terreo. Iso provocou que á súa volta a Galicia tivese que poñerse as pilas e adestrar para afrontar o verán: «Era unha oportunidade que non podía deixar escapar. Se a nivel deportivo estivésemos a gañalo todo, pensaríame na posibilidade de priorizar o remo».
En canto á tempada actual, agarda que o Puebla faga un bo papel na regata que este sábado comeza ás 17.30 horas para volver a ondear a bandeira na Pobra, algo que só conseguiu ata a data unha vez, o ano pasado.
Cun «dos equipos máis novos da Liga B e con toda a xente da casa, a nosa intención é ir a por todas as bandeiras e remar o ano que vén na Liga A», indica González. Tamén, resalta que a pesar de que a competición conta con tan só cinco traiñeiras, o nivel «é moi alto. A Cabana-Ferrol xa demostrou que anda moi forte e creo que os dous ou tres primeiros da B poderiamos estar na metade da táboa da Liga A».