Segundo medios, Sainz podería correr o próximo ano en McLaren
03 ago 2018 . Actualizado á 19:27 h.A escuadra Renault confirmou hoxe a fichaxe de Daniel Ricciardo para a próxima tempada de Fórmula 1, un movemento que obriga ao español Carlos Sainz a buscar un novo equipo.
Renault sinalou nun comunicado que Ricciardo, de 29 anos, compartirá garaxe co alemán Nico Hülkenberg. Por tanto, o outro piloto de Renault, Sainz, deberá buscar un novo volante. Segundo medios, o español podería fichar por McLaren.
A fábrica francesa anunciou o acordo con Ricciardo, que asinará por dúas tempadas, uns minutos despois de Red Bull comunicase o adeus do australiano.
«É posiblemente unha das decisións máis difíciles que tiven que tomar na miña carreira. Pero creo que é o momento de asumir un novo desafío», comentou Ricciardo, que leva cinco tempadas en Red Bull.
«Son consciente de que Renault ten moito traballo por diante se quere acadar o obxectivo de competir ao máis alto nivel, pero estou sorprendido pola súa progresión nos últimos dous anos. E sei que Renault sempre acaba gañando», engadiu. «Agardo poder axudar ao equipo nesta viaxe e axudar dentro e fóra da pista».
Minutos antes do comunicado de Renault, Red Bull anunciaba que Ricciardo trasladáralles a súa decisión de deixar o equipo.
O australiano é un dos pilotos mellor valorados da grella da Fórmula 1. Debutou na máxima categoría do motor en 2011 co equipo HRT e despois pasou dúas tempadas en Toro Rosso antes de dar o salto a Red Bull en 2014.
Coa escuadra enerxética logrou desde entón as sete vitorias e os 29 podios que ten no seu palmarés.
Ricciardo gañou esta tempada dous Grandes Premios e actualmente está quinto na clasificación xeral con 118 puntos. Con todo, está lonxe de pelexar polo título mundial. O líder da tempada, Lewis Hamilton, conta con 213 unidades.