O negro alaga de reivindicación a alfombra vermella dos Bafta

A alfombra vermella dos premios Bafta do cine británico é hoxe un foro de reivindicación co negro que domina os traxes das actrices e coa presenza de activistas que denuncian o acosos sexual. Sally Hawkins, Saoirse Ronan, Kristin Scott Thomas, Salma Hayek, Olivia Spencer, Annette Bening, Gemma Arterton ou Letitia Wright foron algunhas das primeiras actrices en chegar á alfombra vermella destes premios, que se entregan no Royal Albert Hall de Londres nunha cerimonia que comezará ao 20:00 GMT.

Algunhas delas chegaron acompañadas de activistas como parte dunha campaña de apoio ao movemento Time's Up, cuxo obxectivo é acabar co acoso sexual no mundo do cine e lograr a igualdade entre homes e mulleres. Arterton, por exemplo, desfilou pola alfombra con Eileen Pullen e Gwen Davis, dúas mulleres que foron parte nos anos sesenta dunha serie de protestas para lograr a igualdade de salario para as mulleres.

A protesta de negro chega aos BAFTA tras protagonizar tamén a gala dos Globos de Oro na onda de protestas contra o acoso sexual que se iniciou polo escándalo ao redor do produtor Harvey Weinstein e a campaña Me Too, que sinalou a outros nomes de Hollywood como Dustin Hoffman, John Lasseter ou Brett Ratner.

Un movemento ao que se uniron case 200 actrices británicas -entre as que están Keira Knightley, Emma Thompson ou Naomie Harris- que hoxe publicaron unha carta aberta na que chaman á «unidade» contra o acoso e o abuso sexual e a impunidade en todas as industrias.Emma Watson tamén fixo pública hoxe a doazón de 1 millón de libras (1,1 millóns de euros/1,4 millóns de dólares) a unha nova campaña para axudar en Reino Unido ás vítimas de acoso sexual.

Unhas protestas que protagonizan o preámbulo dunha gala na que A forma da auga, do mexicano Guillermo del Toro, e Three Billboards Outside Ebbing, Missouri (Tres anuncios nos arredores), do británico Martin McDonagh, chegan como favoritas da noite con 12 e 9 nomeamentos, respectivamente.

---

---

---