Robin Williams interpretou na súa carreira papeis tan memorables como o do profesor Keating en «O club dos poetas mortos» ou o do locutor Adrian Cronauer en «Good morning Vietnam»
12 ago 2014 . Actualizado á 19:33 h.Tras a súa morte aos 63 anos, Robin Williams xa é historia do cine. O actor estadounidense tivo unha longa carreira repleta de éxitos na que protagonizou varios papeis memorables. Foi a Señora Doubtfire, o médico de Despertares e Alan Parrish en Jumanji. Gañou un Óscar pola súa interpretación dun psicólogo nO indomable Will Hunting, pero quizais este non sexa o seu personaxe máis popular. Ese posto dispútano dous rebeldes, o locutor Adrian Cronauer de Good morning Vietnam e o profesor Keating dO club dos poetas mortos. Os noventa foron a súa mellor época artística.
Good Morning Vietnam foi a película que lanzou á fama mundial a Robin Williams. Estreada en 1987, conta a historia dun DJ desprazado a Saigón para entreter aos soldados que se revela como un locutor demasiado politicamente incorrecto para o alto mando. Williams gañou un Globo de Oro pola súa interpretación neste filme dirixido por Barry Levinson.
O club dos poetas mortos foi o seguinte grande éxito na carreira de Robin Williams. Chegou aos cines en 1989 e logrou gran popularidade. Conta a historia dun grupo de alumnos dun exclusivo, prestixioso e anquilosado colexio de elite que descobren a poesía e a vida da man dun novo profesor de literatura, John Keating. É famosa a escena final na que os alumnos, nun xesto de rebeldía, despiden ao mestre cun soado verso de Walt Whitman: «Oh capitán, o meu capitán».
NO rei pescador (1991), Robin Williams interpretou a outro personaxe icónico, un vagabundo neoiorquino chamado Parry que di ser un cabaleiro medieval en busca do Santo Graal. Na película, dirixida polo ex Monty Python Terry Gilliam, Williams mantén un gran duelo interpretativo con Jeff Bridges, coprotagonista nunha historia con encanto que conseguiu bastantes premios.
Ese mesmo ano Williams tamén encarnou a un heroe de fantasía, Peter Pan, na discutida revisión do mito do mozo que non quería crecer que fixo Steven Spielberg en Hook, o capitán Garfio.
A película que lle deu o Óscar a Robin Williams foi O indomable Will Hunting. Neste filme de Gus Van Sant estreado en 1997 o falecido actor interpreta a un psicólogo que axuda ao protagonista, Matt Damon, a superar os seus problemas de adaptación social.