Música, pizza, tortilla e churrasco na inauguración de Tizon's Pizzería, situada na parroquia abegondesa de Orto, con grande acollida dos veciños
06 feb 2020 . Actualizado á 17:58 h.Ata hai pouco esta pizzería estaba situada na parroquia de San Tirso, pero o local quedáballe pequeno, así que Manolo Vázquez Tizón, o propietario, decidiu trasladarse á fronteira entre Crendes e Orto, outras dúas parroquias de Abegondo, a un local moito máis grande e acolledor.
Despois dunha gran reforma, a finais de xaneiro celebrou a festa de apertura, e para iso contratou a un dj e invitou a todos a petiscos de tortilla, pizza e churrasco. Ao evento achegáronse amigos, veciños e curiosos que encheron o local en pouco tempo.
O establecemento é moi amplo e luminoso e está distribuído en tres ambientes, o bar e cervexería, pizzería e restaurante, e unha gran terraza acristalada onde tamén se pode comer.
O Tizon's ten unha ampla carta de pizzas onde a especialidade son as de roxóns e de zorza. Eles mesmos fan a masa e utilizan «produtos de boa calidade».
Tamén existe a opción de encargar a pizza para levar mentres o cliente se toma unha cervexa ou un café.
Ao ser asador, na carta tamén ofrecen churrasco de tenreira e porco, entre outros pratos máis típicos como luras, raxo, zorza ou tortilla.
A música vai estar moi presente no Tizon's, e por iso tamén ten o seu espazo. Un pequeno e discreto escenario situado ao fondo do restaurante e totalmente integrado no deseño do local. Manolo ten a idea de contratar a dúos ou a un dj que animen as veladas das fins de semana, e chegar así a todos os públicos..