As actividades celebraranse do 15 ao 19 de decembro e estarán destinadas a nenos e familias
13 dic 2025 . Actualizado á 17:53 h.Como cada ano, e co obxectivo de promover hábitos máis responsables e sostibles durante as festas do Nadal, o Concello da Coruña organiza no hall da Casa da Auga unha semana de actividades dirixidas a concienciar ao público de todas as idades sobre a importancia de apostar por un Nadal máis sostible.
A concelleira de Medio Ambiente, Yoya Neira, sinala que «a celebración do Nadal adoita ir asociada a un aumento do consumo de recursos, unha maior xeración de residuos e o uso masivo de materiais de curta vida útil». Neste sentido, explica que «coa posta en marcha destas actividades búscase que os máis pequenos sexan máis conscientes da importancia da recuperación e a reciclaxe, demostrando que é posible gozar destas datas á vez que se contribúe á sustentabilidade e á economía circular». Os talleres, deseñados para o público infantil e familiar, celebraranse do luns 15 ao venres 19 de decembro, en horario de 16.30 a 20.30 horas.
Actividades programadas
Durante toda a semana desenvolverase a actividade diaria Estrelas con mensaxe, na que as persoas participantes poderán escribir un desexo, mensaxe ou compromiso sostible nun soporte con forma de estrela. Todas elas colgaranse en dúas árbores de madeira, creando un mural colectivo con propostas para un Nadal máis consciente.
Os luns, mércores e venres terá lugar o taller Marionetas que contan historias, no que se elaborarán marionetas móbiles a partir de materiais reutilizados. Cada creación representará unha especie da cidade, fomentando o respecto pola biodiversidade urbana.
Pola súa banda, os martes e xoves celebrarase a actividade Adornos de barro con pegada natural, onde os participantes traballarán con barro para crear pequenos adornos do Nadal cun acabado natural, utilizando follas e outros elementos vexetais como estampaxe