A denuncia dun veciño da Coruña permite desarticular unha rede dedicada ao duplicado de cartóns SIM con sete detidos
A CORUÑA
Os estafadores usaban enxeñería social para enganar á operadora e ter o control do número
15 nov 2025 . Actualizado á 11:03 h.A Policía Nacional desarticulou unha rede dedicada a estafas mediante a técnica do SIM swapping (tamén coñecida como intercambio de SIM) tras unha investigación iniciada na Coruña, que permitiu esclarecer 16 casos repartidos por toda España. A operación, dirixida polo Grupo de Investigación Tecnolóxica da Brigada Provincial de Policía Xudicial da Coruña, comezou tras a denuncia dun veciño da cidade que detectou cargos fraudulentos nas súas contas e movementos bancarios que el non autorizara.
O afectado, residente na Coruña, afirmou recibir múltiples cargos efectuados con cartóns que nunca solicitou, ademais de transferencias desde a súa conta a caixeiros concretos para que os estafadores puidesen retirar o diñeiro. A cantidade defraudada acadou os 9.500 euros.
As pescudas permitiron comprobar que os delincuentes utilizaban o coñecido sistema de SIM swapping, polo que enganan á operadora telefónica para trasladar o número da vítima a un cartón SIM baixo o seu control. Para conseguilas recorren a enxeñería social, facéndose pasar pola vítima, proporcionando información persoal roubada como datos de identificación ou respostas a preguntas de seguridade. Unha vez que teñen o control do número, logran recibir os códigos de verificación de dobre factor (2FA) enviados por SMS e acceder a contas bancarias e outros servizos persoais dos prexudicados.
No marco da investigación, a Policía logrou vincular este modus operandi a múltiples vítimas en distintas cidades, entre elas A Coruña e Ferrol, ademais doutras localidades como Ávila, Melilla, Marín, Valladolid, Madrid ou Zaragoza, ata un total de 16 denuncias esclarecidas.
Tras semanas de investigación e de coordinación entre distintas unidades, os axentes identificaron o grupo responsable. Finalmente, os sete autores foron detidos en Sant Adrià de Besòs (Barcelona), onde se concentraba o núcleo operativo da rede.
A Policía Nacional lembra que, ante a perda repentina do servizo telefónico ou sospeitas sobre un duplicado non autorizado da SIM, é fundamental contactar de inmediato coa operadora para recuperar o control da liña e evitar que os delincuentes accedan a información sensible ou a contas bancarias. O obxectivo principal dos estafadores adoita ser o de roubar diñeiro, comprar criptomonedas ou acceder a información sensible. «É un ataque perigoso, porque non depende de hackear dispositivos, senón de explotar vulnerabilidades humanas nos procesos das operadoras», sinalan desde o 091.