Conclúe a primeira quenda dos campamentos de verán en Betanzos, beneficiando a 60 nenos con actividades lúdicas e educativas

A alcaldesa de Betanzos, María Barral, xunto ao concelleiro de Xuventude, Ricardo Cheda, mantivo un encontro cos nenos que participan nos campamentos de verán cuxo primeira quenda concluíu este venres. Trátase dunha actividade coa que o Concello busca favorecer a conciliación familiar e para a que este ano se ampliou o horario e poder así cubrir a demanda de moitas familias, con actividades que a diario son de oito da mañá a tres da tarde. Estes campamentos están dirixidos a nenos e nenas de 3 a 12 anos de idade. A segunda quenda comezará o luns, día 7, ata o 26 de xullo e o terceiro do 29 de xullo ao 14 de agosto. En cada quenda participan 60 alumnos.

Os campamentos celébranse en dependencias municipais, preferentemente no Francisco Vales Villamarín. Todas as actividades teñen como eixo vertebrador a igualdade entre nenos e nenas, a través de iniciativas lúdicas de lecer e tempo libre. A través do xogo cooperativo trátanse valores de respecto, igualdade de xénero, diversidade, resolución de conflitos e o fomento da cultura e da lingua galega.

Tamén se fomenta a educación para a saúde, a través do deporte e das comidas saudables, así como o respecto ao medio ambiente. Hai actividades deportivas, xogos de cooperación, actividades musicais, artísticas, de manualidades, audiovisuais, e módulos específicos de igualdade de xénero, con visitas de interese, con dúas saídas a outros municipios de interese cultural e deportivo.

---

---