Centros comerciais e supermercados, pechados este sábado e domingo na Coruña: isto é o que poderá abrir
A CORUÑA
As zonas de restauración e os cines poderán subir a persiana, do mesmo xeito que as librerías e establecementos de alimentación con horario especial
14 may 2025 . Actualizado á 13:46 h.Os centros comerciais, e os supermercados estarán pechados esta fin de semana. Dous días continuados de peche excepcional que se deben a que o sábado se celebra o Día das Letras Galegas e o domingo, 18 de maio, non é un dos dez ao ano que elixiron as grandes cadeas para abrir. Os súpers con horarios especiais e as librerías si poderán subir a persiana. Do mesmo xeito que a restauración ou os cines das grandes superficies.
O decreto 171/2024, do 8 de xullo, da Xunta estableceu como un dos festivos autonómicos o 17 de maio, o Día das Letras Galegas, que se celebrará este sábado. Segundo a lei 13/2006, do 27 de decembro, de horarios comerciais de Galicia, esta é unha festividade de primeira orde, ao nivel do 1 de xaneiro, 1 de maio, 25 de xullo e 25 de decembro. Iso significa que os establecementos comerciais non poderán abrir as súas portas. Salvo os negocios dedicados á venda de libros, que poderán abrir o vindeiro sábado, «con ocasión da celebración do Día das Letras Galegas», di a norma.
Para evitar o peche, excepcional, de dous días seguidos, os establecementos comerciais teñen a facultade de elixir dez domingos ou festivos ao ano para abrir. Poderían elixir o 18 de maio como xornada de apertura, pero non foi así. A orde do pasado 17 de setembro de 2024 da Xunta estableceu os seguintes días de apertura: 5 de xaneiro, o 12 de xaneiro, o 17 de abril, o 29 de xuño, o 30 de novembro, o 6 de decembro, o 8 de decembro, o 14 de decembro, o 21 de decembro e o 28 de decembro.
O artigo 6 da lei 13/2006, do 27 de decembro, de horarios comerciais de Galicia establece que os domingos e festivos de apertura «serán determinados para cada período anual mediante orde da consellería que posúa as competencias en materia de comercio, que se publicará no Diario Oficial de Galicia antes do 15 de outubro do ano anterior ao da súa aplicación, previa consulta ás asociacións de consumidores máis representativas con implantación en toda a Comunidade, ao Consello Galego de Cámaras Oficiais de Comercio, Industria e Navegación de Galicia e ás demais organizacións empresariais e sindicais do sector comercial máis representativas de Galicia».
José María Seijas, presidente da Federación Galega do Comercio, un dos entes consultados, explica que non houbo ningunha discrepancia á hora de elixir as xornadas de apertura. «Escolléronse as que en principio enténdese que van funcionar mellor», afirma. A aposta deste ano foi por abrir todos os domingos e festivos das campañas de Black Friday e Nadal, en novembro e decembro. Ademais, abriuse o pasado xoves Santo, abrirase o próximo 29 de xuño para as rebaixas de verán. E os dous que quedan ata sumar dez foron o 5 de xaneiro, véspera de Reis, e o 12 de xaneiro para os saldos de inverno.
Que poderá abrir esta fin de semana
Segundo a citada lei, os establecementos que teñen liberdade horaria e, por tanto, poderían abrir este domingo serían os negocios que dispoñan de «unha superficie útil para a exposición e venda ao público de ata 300 metros cadrados». E quedan excluídos «os pertencentes a empresas ou grupos de distribución que non teñan a consideración de pequena e mediana empresa».
Máis aló desta posibilidade, os negocios que seguro estarán abertos este sábado son as librerías, que terán ademais a posibilidade de facer un desconto do 10% nos libros en galego. Manuel Arenas, propietario da librería Arenas da Coruña, conta que o Día das Letras Galegas só estarán abertos en horario de mañá. «O día forte de venda adoita ser a véspera, ademais este ano que cae fin de semana segura que moita xente aproveita a facer unha escapada e, por iso, só estaremos abertos pola mañá», explica. Ademais, a programación especial expuxérona para o venres, coa firma de Susana Fraguela, autora de Enfiando a vida, ou Braulio Pérez Astray, escritor de Médicos e medicamento rural na Costa da Morte.
Conseguir libros relacionados coas homenaxeadas no próximo Día das Letras Galegas vai estar máis complicado. «Teño poucos exemplares de libros relacionados co tema deste ano», di Manuel Arenas. Cabe lembrar que este ano a Real Academia Galega dedicou o día á poesía popular oral, personificada nas cantareiras. En concreto, en sete mulleres, catro das cales figuran no Cancioneiro de Dorothé Schubarth cun número elevado de cantigas, melodías e letras, como é o caso de Adolfina e Rosa Casás, de Cerceda; ou o de Asunción Garrido e Manuela Lema, de Mens. As outras cantareiras de Mens, Teresa García Prieto e Prudencia Garrido, non foron informantes de Schubarth, pero consérvanse delas importantes documentos sonoros. O mesmo ocorre con Eva Castiñeira, de Muxía.
Supermercados con horario especial
Outros establecementos que estarán abertos e preparáronse para un aumento do volume de traballo son os supermercados que xa abren os festivos e domingos. Patricia Dávila, do Carrefour Express Pérez Ardá, explica que para esta fin de semana agardan unha grande afluencia de clientes debido ao peche dos grandes supermercados. «Nós adoitamos estar a lume de biqueira», sinala. Por iso, xa teñen previsto reforzar tanto o persoal como o aprovisionamento de produtos, unha estratexia habitual en xornadas con alta demanda.
No entanto, Dávila apunta que cada vez hai máis clientes que teñen costume de facer a compra os domingos. «O inicio deste tipo de establecementos é para comprar os esquecementos, pero tamén hai moitos que xa deixan a compra para o domingo porque veñen máis tranquilos», comenta. Así, moitas persoas aproveitan que teñen máis tempo libre durante a fin de semana para facer a compra con calma, evitando as présas do final da xornada laboral entre semana. «As compras dos domingos sorprenderíante, de verdade que si», engade Dávila.
O certo é que o sector dos supermercados que abren os domingos non deixa de crecer na Coruña. Lonxe quedou o tempo en que só estaba aberto o extinto Opencor de Juana de Vega, agora reconvertido en Carrefour Express. Agora, ademais da marca de distribución gala, Claudio, Eroski, Coviran ou Spar teñen senllos establecementos distribuídos por toda a cidade.