Os catro ocupantes puideron saír antes sen problema e non resultaron feridos
19 abr 2025 . Actualizado á 20:39 h.Os bombeiros do parque comarcal de Betanzos tiveron que desprazarse este venres ata o punto quilométrico 35,5 da AP-9 para sufocar un incendio nun vehículo. Foi un particular o que alertou ao 112 ao redor das 16.20 horas de que o coche no que viaxaban catro persoas comezara a arder á altura da parroquia de Visantoña, en Mesía, en dirección cara a Santiago de Compostela.
O condutor tivo marxe para manobrar e deixar o vehículo na beiravía e todos os ocupantes abandonaron sen problemas o turismo. Cando chegaron os bombeiros, as chamas afectaban a todo o coche, que quedou completamente calcinado. Ata o lugar desprazáronse tamén axentes da Garda Civil de Tráfico, membros do GES da Estrada e o servizo de mantemento da autoestrada.
Por fortuna, ningunha persoa resultou ferida e o incendio saldouse simplemente con danos materiais. A pesar do aparatoso do lume e a cantidade de medios desprazados ao momento, o suceso non afectou de xeito considerable ao tráfico da vía que, ao ser un día festivo, rexistraba menos circulación da habitual.